摸魚手劄｜天下之筵席（渾水）
2014年，我用渾水這筆名在網上寫了一系列的文章，以極刁鑽古怪的金融技術角度去分析當時的雨傘運動，非常viral，在網上累積了少量名氣，引起了蘋果日報財經版股榮的關注。他遂親自邀約我在蘋果日報寫專欄。
當時香港主流財經版都是給一些冇水平的老屁股把持著，青黃
不接，股榮有改革的心，引入了不少年輕作家。老實說，初初由網上世界走入實體報紙，我不適應，因為要寫得很貼市，也不知讀者需要甚麼，結果發揮不好。
股榮連番改革後，版面一下子變成了小清新，我當時向股榮提出，想由寫周五改寫周日。周日可以寫更多字，且不必太貼市，可讓思緒沈澱一下，此時我的發揮比較穩定，點擊率亦慢慢向上，最緊要自己寫得開心自在。偶然趕交稿，文句有沙石，錯字百出，還冒編輯幫忙校對和讀者不嫌棄。
寫了專欄後，認識不同各界好朋友，例如馮睎乾和中大師兄香樹輝，我的名字間中也出現在他們筆下。漸得多人賞識，專欄越來越多，也成為財經作家，至今出了5本書，高峰時期一個禮拜寫超過一萬字。當時跟人說自己寫蘋果日報，也有莫名其妙的自豪感。現在更加唔使講，蘋果如此田地，能夠一起捱到最後斷氣，更是與有榮焉。
喺訂閱制仲未盛行嘅年代，蘋果出現過幾年嘅營運困難，佢哋開始搞新項目，仲記得有段時間我每日要8點起身去蘋果日報大樓做直播，當然，也不計較甚麼人工車馬費。後來，我多次主動同股榮講自願減稿費，就算唔俾我都無所謂。上年開始，蘋果作家逃亡，我請纓多寫一日，同樣地，也是不計較任何稿費。
雖然和股榮合作了很長的時間，但係我哋唔係特別多交流，他很有正義感，但很難聊。我是蘋果日報財經版一個不錯的消息提供者，有幾個驚天地泣鬼神的B1跟我有關，事後他會約我食飯。我們可以整頓飯沒有交流，我知道大哥不喜歡社交說話，也不勉強，大家合作做朋友舒服就好。心底裏，我對佢心存感激。
曾經跟不同專欄分手，以今次這種方式和讀者說再見，我很不甘心。但我唔想留比蘋果最後嘅文字，只剩下憤怒和怨懟，這點知遇之恩，我永記心上。
蘋果令牛頓發現萬有引力，喺嗰個年代，蘋果啟蒙一代人，走上科學發展嘅道路。喺今天，蘋果依然帶領人走向更文明嘅方向，令人可以站開巨人肩膊，俯瞰世界文，擁抱普世價值。唯獨不變嘅係，今天我們可以準確計算天體嘅運行，但係冇辦法計算人性嘅瘋狂。對，即使現代化的今天，人性依然非常瘋狂。小小的蘋果，改變了世界，啟迪了人心。
結筆時，電腦播緊撐新疆棉花陳奕迅的《最後派對》：「……開心的派對，散後無法聚，放我於心裡。新的工作裡，一追再去追，未開出最後的花蕊。你別要氣餒，何妨留戀一歲，多一歲，一歲。」蘋果報慶生日後，沒過幾日就要說再見，天下無不散之筵席，世事，多麼諷刺。
渾水
-----------------------------
蘋果App大升級 更簡潔更就手！了解更多（立即下載體驗）
-----------------------------
點擊即睇《Bitcoin投資入門手冊》
一書盡覽新手必讀資訊
-----------------------------
【全球樓行】 Dream House零距離
屬於香港人的移民攻略
摸魚手札 - 渾水 舊文
來源 source: http://hk.news.appledaily.com
