士佳說 - 張士佳 2021年9月14日
【#士佳說 】張士佳：繼續走火警
【#士佳說 】張士佳：繼續走火警
周一指數繼續調整，跌600 ，尾市反彈，冇乜特別，早前話似2018 炒法，上星期三都講咗如果似2018年，嗰日應該遇到阻力，結果嗰日就係暫時嘅頂，其實冇乜特別嘢，暫時都係反覆為主，但係係低位反覆，將來唔係好事。
我冇理個市，繼續細注找異動股交易，尋日冇乜特別，只係trade左幾隻，特別要注意嘅係通脹預期已經愈來愈強，不利整體股市。在上週五，鋁和銅回軟了一日，昨日中國鋁業#2600、江西銅業#358都繼續大升，但筆者就唔願再高追了，找出相對落後的有中黃金國際#2099、洛陽鉬業#3993、有色金屬五礦資源#1208，鐵貨#1029等或者還有追落後空間。還有另類資源股紙業#2314理文造紙#2689玖龍紙業等都在蠢蠢欲動，通常資源炒到後尾就炒紙業，可以望多兩眼。
老牌紅籌發力，光大中信北控，各自各精彩，高中低都有，當中大光燈照得最高，中央十四五規劃，內容集中環保政策，仿如國家首要任務，光大係食淨條水，#1857中國光大水務、#1257中國光大綠色環保；當中#257光大環境有6個廢棄物轉製能源項目被納入可再生能源發電補貼項目清單，合計涉及產能每日4,800噸可獲政府補貼，較去年底止產能提升16.5%，股價就全部破晒頂，信不信由你。
還有騰盛博藥#2137將再投入1億美元，以推進其在研的針對SARS-CoV-2(導致COVID-19的病毒)的聯合療法，昨日繼續獲資金追捧由頭升到尾，刷新歷史新高。
話似2018年，咁梗係有主角，恒大#3333問題似是浮上水面，據報有投資者圍堵恒大深圳總部要求還錢。雖然主席許生不停想向市場派定心丸，可是如此龐大的債務，真的不知能夠掩蓋到甚麼時候。若問題發酵，或真的有中國版的雷曼事件出現，唯一唔同嘅係上次意外咁來，今次就走火警咗十次八次了。
士佳說 - 張士佳 舊文
本文作轉載及備份之用 來源 source: http://skycheung.weebly.com
