如果輸唔起就唔好炒樓
在中秋節前夕，有老友到公司吹水，佢話股市大冧，唔見了很多錢，不過冇得賴，又冇人揸住支鎗迫佢買股票，我同老友講，千祈唔好同其他人呻，除了得唔到任何安慰之外，隨時會俾人話如果輸起就唔好炒股票。
內地有不少人以為炒樓不是賭，是投資，地產商有責任保障他們一定要賺錢，如果
唔賺錢，就容許他們退房，仲要賠償利息給他們，這叫做維權。其實，這是內地物業炒家未成熟表現，投資物業是最豪賭，不少人一生都唔敢落注，錯過了一次又一次良機，到現在仍然要租樓住，如果炒樓可以維權，那些人一早已經炒樓，維權其實是助長炒風。
有買深圳豪宅樓盤的人話，他們傾家盪產買樓，現在樓價下跌，他們一定要維權。其實維甚麼權，買豪宅的人點會傾家盪產，搵嚟講。在香港，樓價愈高，借錢愈少，如果不是手頭鬆動，就千祈唔好買豪宅，不過，那些人又並不是講錯，他們是傾家盪產去炒樓。
中央政府三申五令，已經講了不少次住房不炒，炒家唔理中央意思就冇辦法，現在樓價下跌，炒家不但想盡辦法要求退錢，仲要維權，希望中央政府出面支持炒家。其實，這是炒家示弱表現，炒樓是一次豪賭，如果輸了千祈唔好講甚麼維權，否則就會俾人話，如果輸唔起就唔好炒樓。
作者為紀惠集團行政總裁
湯文亮專欄 - 湯文亮 舊文
本文作轉載及備份之用 來源 source: http://www.am730.com.hk
