笑到最後｜為何專家睇法多數悲觀？（高明）
笑到最後｜為何專家睇法多數悲觀？（高明）
近期嘅疫情，不論國籍，專家普遍悲觀，又要戴口罩又要封關，反而一般具備常識嘅人，例如英超球迷，就已經如常生活。
10月26日高明喺笑到最後專欄寫「認住新巴巴：阿根廷阿里巴巴」，推介MercadoLibr
e Inc.（MELI），係繼本欄推介新騰訊：Sea Limited（SE）之後， 另一個鼓勵大家擴闊眼光，將騰訊阿里巴巴成功故事宣揚開去，繼而成為新騰訊阿里巴巴嘅持份者，守護住呢種獨特嘅增長及尋租概念於一身嘅上升股。
美股、外匯、加密貨幣免費即時報價，自選投資組合獲取相關新聞提示。
當日推介時，MELI 股價為1,545美元，推介後公布業績，股價接連上升，截稿前股價已經升至1,662.37美元，推介至今股價上升7.6%。同期阿里巴巴（9988）股價則下跌9.19%，此一比較，已經知道市場對於阿里巴巴概念資金會擺去邊度。正如所有愛情故事一樣，喜歡一個人，不一定要佔有他，喜歡阿里巴巴概念，可以買年輕版的阿里巴巴MELI，一來可以嚐鮮，二來亦係對前度的含蓄致敬。
回到正題， 近期美股又開車變成開飛機，美國甚至已經宣佈通關，連帶航空股都翻生，但係，對於網上專家嚟講，反而多講股災見頂之類。
對於美國股民，比較不幸嘅係網上世界係一面倒專家之言，而美國社交媒體仲有cancel culture；香港人嘅幸運係曾經喺樓市爭論上，出過一位天水圍師奶，直言食屎專家，訪問後若幹年樓價上升令到師奶大勝專家。再推闊一啲睇，就算係近期嘅疫情，不論國籍，專家普遍悲觀，又要戴口罩又要封關，反而一般具備常識嘅人，例如英超球迷，就已經如常生活。
行穩陣路 不會創新
點解普遍專家都會特別悲觀？其實由專家選擇做專家嘅階段，大概係入大學前考試嘅階段，已經自我選擇一條穩陣嘅路，就係成為專家，每個月有穩定收入（是否可觀視乎國家而定，普遍香港專家收入偏高），整個職業生涯由佢進入一刻已經有好清晰嘅路徑。一個選擇呢條路作為人生嘅人，成功係靠打穩陣波，即使想法唔係悲觀，但肯定唔會特別創新。
至於股市更甚，因為專家講股，大多數屬於銀行金融背景，銀行家係一啲異常保守嘅人，以往冇比較冇傷害，銀行家仲可以拎住金融才俊光環，近年開始湧現非銀行背景嘅虛擬銀行，再同傳統銀行一比，傳統銀行存戶嘅錢畀銀行家限制使用，條數大問你點解條數咁大，條數細借頭借路取消戶口，過數大額少少又問長問短，買加密貨幣更加覺得你係叛徒。喺同樣嘅監管框架之下，虛擬銀行鬆手好多，雖然都有麻煩嘅嘢，但係整體來講自己啲錢更加似自己錢，亦都反證傳統銀行嘅限制唔係來自監管架構，而係銀行自己本身保守，兼想為難啲客。有咁樣背景嘅人講股，多數都唔會太欣賞啲冇前路出現過嘅事。
再推遠幾步，只要你稍為揭下有關喬布斯、馬斯克嘅書，呢啲係創業時期破壞性創造嘅人，走嘅一條路同專家完全唔同，例如喬布斯創辦蘋果，有冇諗過會俾自己董事局踢走？馬斯克搞PayPal嘅時候，有冇清晰道路睇到佢將來會射火箭？我相信近期聲譽麻麻嘅朱克伯格，喺哈佛寫程式嘅時候，都冇諗過未來可以左右到總統選情。
寫到呢度唔係叫大家見到專家都叫佢食屎，鼓勵反智，而係好多時候，我哋都需要保持適當嘅無知樂觀，因為未來大部份發生嘅事，都係未知嘅事，既然係未知，初頭嘅無知變得唔太重要，剩下來嘅就係樂觀。如果長期維持專家視覺，覺得世界就好似佢嘅專業考試以及職業生涯，全部都有已知答案，所有超出認知嘅答案都係nonono，最後都係輸畀師奶，點解唔一開始放開睇法去接受呢？
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介：賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
