笑到最後｜繞股災難周 未來投資攻略（高明）
笑到最後｜繞股災難周 未來投資攻略（高明）
繞股本身就有繞氣，股價長期喺某啲位打圈，高位回落之後不停咁「繞」。
啱啱過去嘅一個星期，可以話係霸權股同繞股嘅最大分野，霸權股繁榮昌盛，但繞股並沒有分享它的升幅，霸權股開香檳，繞股唔敢凍飲加兩蚊，
霸權股的勝利，並不是繞股的勝利。
美股、外匯、加密貨幣免費即時報價，自選投資組合獲取相關新聞提示。
納指突破16000點歷史高位，雖然鮑威爾連任聯儲局主席即日令美國10年期國債息率上升，股市星期一晚即日轉向，但整個格局冇變，霸權股跌，但繞股更加係洗倉。
大家可能唔明咩係繞股。顧名思義，繞股本身就有繞氣，股價長期喺某啲位打圈，高位回落之後不停咁「繞」，再大鑊啲，係曾經光輝過，其他股升勢繞場一周後，繞股仍然原地踏步，就係為之繞股。打開股價圖，股價不斷兜圈，嗰隻就係繞股。
港股屬繞市 曾經風光過
值得一睇，如果用呢一個做指標，港股成個市場都係繞市，雖然曾經風光過，咩港股大時代、3萬點不是夢，但係拎返2015年喺中環影嘅恒指收市報價相，點數竟然同今日冇乜分別，分別只係路人有冇戴口罩，港股本身都好繞。
回到正題，高增長類別繞股回落，特別係同SaaS類有關嘅股份，又例如之前炒過一排嘅元宇宙股Unity（U）及Roblox（RBLX），都高位回落，短線主要原因就係上邊講嘅息率上升，令到高增長股不論喺股價折現值，以及增長所需嘅資金成本都受到影響，令到股價即時下滑。
中期今年一路都有呢個趨勢，就係霸權股股價恍如不動明王，兩大霸權蘋果（AAPL）及Alphabet（GOOGL．Google母公司）股市大跌佢冇乜參與，股市一升佢就有份，特別係Google通常都會成為升市龍頭。主要原因係日日QE資金太多，但係買落去嘅人又怕死，同一時間又要追求回報，所以買霸權股就係呢個又要威又要戴頭盔困局嘅最佳決定，股價上升成為自我證實嘅預言。
至於深層次原因就係，美股強者越強就係美國貨幣制度嘅縮影，Finbond報道指過去50年美元貶值85%，呢個數字用官方通脹率計算，高明睇過其他數字，貶值幅度更大，有指30年已貶值九成。無論如何，美元不斷貶值就係事實。
大家可能會問，美元貶值，買資產咪會升，繞股作為風險最高嘅股票資產，應該升得最勁？可惜理論同現實永遠唔同，美國量化寬鬆接近零利率，不等於你借錢可以用零利率，美國政府量化寬鬆可以冇後果，不等於其他國家政府量化寬鬆可以催谷股市，正如第一段所講，霸權股嘅勝利，不等於你嘅勝利。每次美國進行量化寬鬆救市，亦即係可以接觸低利率借貸嘅公司得到救贖，只有躋身霸權股，先有呢個特殊優惠。美股上到市生意已經有返咁上下，但同霸權股政經地位比較，都只係弱不禁風，當中雖然有小部份最後會成為霸權股一員，但金融市場保守係天性，佢成為霸權貴買，多於成長中平買，Tesla（TSLA）就係一例。
大家可能會問，繞股今年咪冇運行？咁又未必，今年已經證明債息上升影響股市時間有限，調整完又行過，霸權股買到頂榜，自然會轉場，耐心等候就得。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
