笑到最後｜美股最美麗的風景是霸權股（高明）
笑到最後｜美股最美麗的風景是霸權股（高明）
港股及美股剛剛經歷完黑色星期五，特別係美股，標題指出道指下跌超過900點。
港股及美股剛剛經歷完黑色星期五，特別係美股，標題指出道指下跌超過900點，俾市場牽著走嘅人就會話好恐慌好驚呀；齋睇唔買嘅人
就會話黑色星期五特價時段。真係有落場嘅人會話畀你知：又話黑色星期五、又話股災，點解嗰日冇大特價？
美股、外匯、加密貨幣免費即時報價，自選投資組合獲取相關新聞提示。
例如高明喺唔同場合講過嘅年底雙箭頭NVIDIA（NVDA）及Tesla（TSLA）， 兩隻嘅特價並唔多，從高位計下跌可能算勁，例如Tesla跌兩成，但係同三個月前比仍然非常貴，並非正常黑色星期五執平貨。
再睇落高增長股，之前講過高增長股一早已經股災咗，既然標題話股災，應該有特價再特價時段，反而黑色星期五當日，唔少高增長股股價低位反彈，唔單止冇減價，仲加咗價。
永遠唔需要清倉
當日都有唔少網友詢問高明使唔使清倉。關於清倉，不如喺呢度一次過回答，只論美國霸權股，其實係永遠唔需要清倉，喺股票市場大家見到霸權股嘅光明一面，現實世界就係霸權股嘅黑暗一面：無論經濟好壞，都賺緊你錢，當你想轉其他供應商，唔係獨市生意，就係來來去去都係同一個牌子，年年月月課金，永遠無限期，一推出新產品就畀佢cross sell到。更加可惜嘅係，除咗疫苗股之外，唔少嘅霸權股，係你自願使用佢嘅服務直到不能自拔。
一間公司做到呢個境界，等於有人自動送錢佢洗，只要過埋最後一關，就係長期來講股價上升，呢一點好重要，決定咗企業負責人嘅誘因究竟係股價上升定係做老千。如果你見到啲霸權股股價成日跌，就可以肯定負責人係一個老千。
比較好彩嘅係美股霸權股普遍誘因在於股價上升，進行回購等手段挾高股價，令到利益集團兌換嘅期權獲得暴利，有份買入嘅人喺側邊食餅碎都食得飽。如果係實施回購嘅另一方向，即係不停供股，就好似喺其他次要股市成日發生嘅事一樣，你明明見到生意日日賺，但股價日日跌，你就會知道負責人執行緊「雙贏」策略：現實贏你一次，股價再贏你一次。
所以點解高明成日講，美股最美麗的風景是霸權股。因為霸權股喺現實世界剝削你、奴役你，要你生生世世賺錢課金畀佢，做吸血鬼；另一邊，佢開一扇窗，畀你成為佢一部份，一齊吸其他人血造就股價升幅。唔係個個市場係咁，造成呢個局面好難得，所以永不清倉就係咁解。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
