大茶飯│天堂與地獄的一天（青冰）
大茶飯│天堂與地獄的一天（青冰）
今次不作分析，只對照年初及年尾，一
個港股投資者怎樣過一天。
在2021年，港股經歷了天堂及地獄，在年初市況火旺，恒指高見31183點，但自2月起就一直反覆下挫，當中的原因大家都聽過很多，今次不作分析，只對照年初及年尾，一個港股投資者怎樣過一天。
美股、外匯、加密貨幣免費即時報價，自選投資組合獲取相關新聞提示。
年初新股最當旺，散戶每朝都會睇實有甚麼新股，由於同期上市的新股太多，不少重點新股的招股期亦會重疊，散戶既要分配資金，亦要確保有孖展額去抽，還記得某劵商利率劃一地特高，完全唔憂做，每次放額時都像搶iPhone一樣，手腳慢啲都會無額。
年初炒港股 年尾砌美股
開市前亦要睇曬主流財經專欄有乜推介，準備開市即刻衝入場，當時大家個倉有十幾隻股係等閒事，開市時段係極為忙碌，戰友之間不斷互飛冧巴，唔買總係覺得多數會升，即使心足食糊係美事，但沽完升得更快更狂，始終不是味兒。中午休市會刨嚇財經新聞，睇嚇通告，朋友約午飯都盡量推卻，心諗你咪阻住曬搵食啦，要食就約夜晚。
每日四點收市感覺像虛脫，但股市係未完的，4點15分新股的暗盤又開波了，抽中快手（1024）又或者B仔，心裡忐忑唔知沽唔沽好，沽咗可以留錢抽下一隻，但更怕佢正式上市後升更多。老暗收市後是計數的時間，計嚇今日贏咗幾多，嘩癡線，原來又贏咗咁多。收市後的通告要睇實，因為稍有利好消息，翌日爆升可期，夜晚都係要早啲瞓，第二朝睇嚇美股新聞已經足夠了。
往事只能回味，現時港股投資者會點呢？
朝早起身第一件事先望嚇個美股倉，睇嚇買賣盤有冇成交，再睇嚇盤後有沒有異動，想食糊及買貨，美股盤後時段去到九點，搭緊車時再慢慢諗吧。
港股時段可以過得輕鬆啲，刨通告變成可有可無，靚通告佔少數，有靚通告而最後股價識大升就更少，財經新聞充斥監管新規及內房撲水，睇得多都悶，偶爾仍會有新股上市，但當超購百倍都會老暗穿底兩成，新股市場已完全冰封。未到午市已經諗定去邊度吃午飯，因為大家都深明，食咗佢總好過輸畀佢（港股）。通常食完午飯就會特別眼瞓，無計呀，因為晚晚都夜瞓炒美股嘛。
先天下之憂而憂，是港股的寫照，A股或美股，邊個跌就跟邊個，即使隔晚美股大升，對港股的刺激都甚短暫，隨時未到中午已經倒跌。消極的投資者會死心唔睇，積極的投資者就會為美股作準備，因為下午五點又是盤前時段的開始，又是充滿機遇的漫漫長夜。
2021年的港股，短暫的天堂生活，伴隨無間地獄，何時會再作交替呢？
青冰
http://www.fb.com/chingbing888
本欄逢周五刊出
大茶飯 - 青冰 舊文
本文作轉載及備份之用 來源 source: http://hk.finance.yahoo.com
