笑到最後｜美國樓市升兩成的啟示（高明）
笑到最後｜美國樓市升兩成的啟示（高明）
一個數字引起高明關注，就係美股嘅樓市指數。
12月14日本欄發表「打氣文2.0︰大膽面對股價下跌」，當時納指為15215點，至截稿前納指新年首日收報15,804.37點，推介至今升3.87%，幾隻主流霸權股，
包括Tesla（TSLA）在內，亦都已經重上接近高位，至於蘋果（AAPL）突破3萬億美元市值則是另一個故事。所以話，即使升幅唔一定多（視乎有冇買Tesla），本祭司都冇老點你，下次見到美股有類似情況，請你忍一忍，然後等待星期三嘅雅虎財經專欄「笑到最後」，再睇嚇本祭司點睇，再決定你手上嘅倉點處理。
美股、外匯、加密貨幣免費即時報價，自選投資組合獲取相關新聞提示。
富國銀行發表策略報告，指出全球經濟有疫情復甦會不成比例地由美國帶動，令到美股將會繼續跑出，繼續相對全球其他股市，美股會繼續佔優。富國銀行對美股嘅評論雖然遲過本欄，但都可以作為參考。
本欄通常只係講美股，但係令一個數字更加引起高明關注，就係美股嘅樓市指數。美國The S&P Case-Shiller樓價指數公布，10月美國主要10大主要城市樓價升17.07%；20個城市樓價按年上升18.4%；全國升19.08%。 呢一系列嘅數字甚有啟發性。
顧名思義，十大就係最主要嘅紐約、洛杉磯、芝加哥、華盛頓等等，然後二十大範圍再大，最後全國性就係好似睇美國總統大選咁唔同州撈落去。
去年美股三大指數，道指上升18.7%，標普500最勁，上升26.9%，納指上升21.4%。雖然全球計算，三大指數唔算特別勁，但係以一個咁龐大嘅經濟體系同股市，呢個升幅本身已經好驚人。不過都未算，拍埋樓市度，美國樓市升幅一啲都唔少，甚至可以直接同美股比較。類似升幅，其實港人見識過，就係2009至2018年，港樓都係咁升，雖然年度計未必齊頭兩成，但有時快有時慢，每年升一成多啲都好穩陣，直至2018年升勢放緩。高明之前喺第二啲場合講過，香港樓應該行先美國樓10零年，大概當2008年香港等於2020年美樓。
在家工作成風 住宅添功能
另一情況，則係10大城市升幅不如20大，20大又不如全國。一方面可能係追落後；但係更重要高明認為係在家工作趨勢，你過去一年嘅樓價升幅有一部份來自住宅功能擴張，可以用嚟做埋辦公室。你可以冇辦公室之下工作，但你唔可以冇住宅。相對之下，未來十年辦公室投資價值好低，睇好商業發展，不如買美股好過。
只要細心留意美股幾個月走勢，就會對升跌開始有感覺，市場嘅情緒直接畀孖展控制，大型股份一升，按倉價值提升，新增流動性就會帶動其他類型股份炒作。正常讀過經濟學嘅人會覺得呢啲係巫術，但係市場又係咁樣行。
只要一個可抵押嘅資產價格上升，周邊嘅資產亦都會起飛。假設美國同香港情況接近，買到樓同買唔到樓嘅人係兩個階層：一、人工中位數字對樓價冇意思，買唔起就買唔起，計死數負擔能力同升跌無關；二、買得起係靠資產而來，香港人係樓養樓，大膽假設美國人係股養樓。至於咩CEO、上市期權嗰批唔係一般中產，都費事計。加密貨幣亦係少數，因為只得2至3萬億美元市值，相對美股48萬億美元市值。
過去10年香港由已發展市場，變成一個先進發達已發展市場，主要係因為樓價急升，沽出一層香港樓可以換到好多嘢，同期嘅香港股市表現一般，傳統債股樓三大市場，香港例子見證發一個已經夠。
未來10年我哋有機會見證美國同時股樓超級牛市，將會嚟自「巫術」，大概係：套現買樓->樓價升->套現買股->股價升->又套現買樓/股。比起香港更勁，就係美國經濟體系大超多，雙線行車，兼未計加密貨幣經濟體系潛力。
新一年，簡單總結：股樓齊升，大家都贏。係時候買美股了。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
