操盤手劄記│怕息魔多過怕戰疫（割柑人）
操盤手劄記│怕息魔多過怕戰疫（割柑人）
地緣最前線嘅當地資產唔跌，美國科技股反而大跌，似乎真正嘅下跌動力，嚟自聯儲局而非俄烏。
俄烏局勢，反轉再反轉！2月11日，美國向盟友通報，俄羅斯最快喺16日攻打烏克蘭；12日，美俄總統通話，互相指摘；14
日，俄總統就外長建議繼續同歐美對話，回答「好吧」；15日，俄發布照片顯示，俄軍喺俄烏邊境演習後撤軍；16日，俄未如美所言攻烏，但歐美質疑俄「假撤軍實增兵」；17日，美再示警，俄幾日內攻烏可能性大；18日，美估算俄已喺俄烏邊境集結17萬至19萬兵力，係二戰後歐洲最大軍事動員，總之日日都有消息，局勢隨時變！
美股、外匯、加密貨幣免費即時報價，自選投資組合獲取相關新聞提示。
戰雲密布，上周五泛歐Stoxx 600指數跌0.8%，美股三大指數跌0.7%至1.2%，都已連跌兩日；以全周計，都已連跌兩周。值得注意嘅係，納指由上年11月19日高位回落15.6%，50天線跌穿200天線，驚現「死亡交叉」，意味有長期下跌趨勢。2000年6月科網泡沫爆破、2008年1月金融危機之前，都曾出現呢個凶兆；但上次2020年4月疫情高峯出現時，卻係觸底反彈。
央行轉鷹 市場最大風險
跌市關打仗事？股市與其估市，不如搵下佐證。如果就嚟打仗，俄羅斯、烏克蘭，以至鄰國波蘭等地的資產理應首當其衝，跌幅大過美股。然而，俄羅斯指數ETF（RSX）相對納指ETF（QQQ）已喺1月下旬見底，近兩周反覆轉強；波蘭指數ETF（EPOL）相對納指ETF（QQQ）已喺上年12月頭見底，近兩月反覆轉強。喺地緣最前線嘅當地資產唔跌，美國科技股反而大跌，似乎真正嘅下跌動力，嚟自聯儲局而非俄烏。
事實上，美銀2月全球基金經理調查顯示，喺市場準備迎接聯儲局大幅收緊貨幣政策之際，基金經理對科技股嘅睇淡程度創近16年之最，持倉跌至2006年8月以嚟最低。此外，三成受訪者預計，今年股市將出現熊市。基金經理「現金為王」，持倉升至5.3%，係2020年5月以嚟最高。央行轉鷹加息連續三個月被視為最大風險，之後依次係通脹、資產泡沫、全球衰退、俄烏衝突、疫情。
滙豐放榜 關注派息回購
睇返港股，港股ADR比例指數低水0.9%，藍籌中槪科網股ATMJN，美國股價分別較香港低2.9%、1.9%、1.7%、2.3%、1.9%。中槪科網股捱沽，皆因上周五發改委引導外賣等互聯網平台減價，為疫情下經營困難嘅服務業紓困。當中，外賣龍頭美團（3690）應聲急跌一成半最傷；當日正係董事長王興43歲生日，據福布斯即時富豪排名榜數據，王興身家單日縮水23億美元，呢個birthday都幾難happy。
本周係超級業績周，多隻藍籌放榜，周二有滙豐（005）、恒生（011）；周三有銀娛（027）、百威（1876）、三度染藍嘅聯想（992）；周四有新地（016）、港交所（388）、阿里巴巴（9988）、網易（9999）等。市場關注滙豐業績會否如渣打（2888）般差過預期，亦關注其派息水平，以及會否新增回購計劃。滙豐ADR股價較香港低1%，或會先行回氣，等放榜後再定後向；中長線嚟講，加息周期始終有利銀行息差收入增加。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
