士佳說 - 張士佳 2022年3月8日
【#士佳說 】張士佳：恐慌
【#士佳說 】張士佳：恐慌
我尋日寫韜光養晦，可能有朋友擔心唔知韜養幾耐，其實唔使太擔心，大市企唔到呢啲水平幾耐，一係再殺落去，一係離底不遠，我唔係升跌都講晒，事實上現在已跌到非常，好難企響呢個水平，我唔係睇新聞憑感覺，純用統計來講，最近12日期指出現五個下跌裂口，過去35年只曾出現五次，恐怖程度可想而知，當然唔係出完呢個形態，就見底，曾經試過再殺落去，然後才見底，我重點係話韜光養晦唔會太耐，唔會係坊間所講嘅漫長下跌。
事實上，俄烏戰火根本未停過，圖表正常地配合實際境況，烏平民淪為談判籌碼，俄要求烏去軍事化不能加入北約保持中立，但到第三輪談判都未有共識。歐美北約除了供烏軍工武器及制裁之外，不願參與戰爭，只想buy time拖長戰事，消耗俄羅斯軍力及經濟，你知我知普京唔會唔知，咁打落去，唔會捱得耐，尤其是蘇聯曾經墮入阿富汗泥沼，佢哋唔會唔知。
尋日，開市直跌成千點多，以一個手上落注唔算多的炒家來說，樂見恐慌完成下跌，等訊號買入；但見反彈最多只有300幾點，一半都唔夠，就知道仲係麻麻，尋日收市冇嘢做，淨係沽下ES 即市，博佢追回跌幅，玩票性質，做唔做都唔緊要，重點保留子彈等大市見底。美國國務卿布林肯表示，美國及歐洲盟友正考慮禁止進口俄羅斯天然氣及石油，以反制俄羅斯入侵烏克蘭。連歐洲亦考慮停止從俄羅斯入口能源，歐洲天然氣期貨爆升79％破頂。 呢單野都影響大家通脹預期之餘，講緊既會係經濟衰退，所以市場好risk off下，歐洲同新興市場基本上都大跌。歷史上曾出現3次石油危機，每次油價急彈，都對全球經濟產生重大影響。跌幅比想像中大，通常呢啲情況一個裂口上升未必頂得住，所以，裂口上升後我只會加少少，等多些訊號確認，先會落大注，到時話你知。
觀望還觀望，手上個別股票之前有買落的，都要走下上落，或者換下碼。油氣價格勢如破竹，升到你唔信。油價上周狂升2成去到139美元了，大行即出來講目標價150美元，但楂住d油股中石油#857，中海油#883等開始跟吾上。睇油都會抖一抖先再上，但太早走貨可能買唔番，咁起碼食一半糊、留啲等囉。就連巴菲特都增持西方石油，美股OXY.US即大升18%，尋日回左少少，Elon Musk 話要立即提升燃油天然氣生產量，未敢睇淡住，食下袋下先啫。
商品股肯定受惠於當前局勢，問題是開始吾易炒，其中煤炭股幾日內勁升超過2成，一直都係跌市奇葩，但尋日神華#1088、#1171高開創52周新高後，倒跌做大陰燭形成阻力，我會走下位，若往後仍要升穿頂，自然會買番。現換落去中國有色礦業#1258、#1208走一轉。
打仗制裁導致油價資源價格急升其實不利經濟，尋日美股急跌成八百幾點，就係驚歐美經濟陷入嚴重通脹，拖累經濟陷入滯脹，唔係收水加少少息就可以解決。因通脹開始擴散到實體經濟層面，率先是飛機，國際油價急升，造成航企成本壓力激增，中國國航#753，插8%領跌航空股，幸運地早前有叫學生落機。
還有小麥價格，已經行得快過油價了，小麥玉米CBOT期貨1個月內升7成，瘋狂被搶高，背後原因當然與俄烏開戰有關。俄羅斯的種農作物出口佔全球四分之一，烏克蘭亦被視為歐洲糧倉。當前戰爭，現在春天都未來得切耕作，預視糧食供應鏈會進一步陷入短缺，造成全球的穀物與菜油期貨價格急升。還有化肥，俄是全球最大的化肥出口國，鉀肥約佔全球供應量的20%。開戰導致鉀肥庫存緊張，由於中國鉀肥自給率僅45%，印度巴西也很依賴進口，糧物短缺化肥低庫，使化肥股成為逆市奇葩，除了提過嘅中國心連心化肥#1866靚圖之外，中化化肥#297都升4%，還有中海石油化學#3983 逆市升近9%跑出，但吾高追了，回一回值得跟下。
反而下午靠內房回穩後拉一拉指數彈幾百點。原因係美的置業同碧桂園#2007與招商銀行獲得60億同150億人民幣併購融資額度，用於地產併購業務開發項目及個人住房按揭貸款業務。地產得到融資舒緩即係受惠放水，國企中海外#688，華潤置地#1109已經逆市升左幾日，之前有貨底，夠硬淨跑贏大市頂下先。
講到最堅，誠哥又賣野，出售英國配電業務UK Power，估值150億英鎊，投資12年升值1.6倍，將有咁大筆收益，市場緊捉超人誠哥尾巴，長和四寶的長建#1038，電能#006創52周新高，但同時又傳出中風，不知真偽。
值得留意兩會穩經濟，除了內房基建，雙碳中和政策仍是兩會的重中之重。除了新舊基建，留意具綠電轉型憧憬的火電，新能源風光鋰電等，有大前提底下之前跌過龍，但仲扛的得住尋日1000點，仍在250天之上果啲。至於內需的概念，兩會之前已經預炒咗一轉，衣家跌曬落嚟，內地山東上海病毒似死灰復燃，不知中國是否有意開放與病毒共存，睇定啲先。
士佳說 - 張士佳 舊文
本文作轉載及備份之用 來源 source: http://skycheung.weebly.com
