笑到最後｜蘋果三天工作制唔收貨啟示（高明）
笑到最後｜蘋果三天工作制唔收貨啟示（高明）
蘋果係2020年最早主張員工喺屋企工作嘅公司。
蘋果（AAPL）發通告，話員工至少一個星期返三日辦公室，最新有蘋果工會AppleTogether反對公司，要求公司畀員工同經理自行決定。截稿前只得270
人聯署，相對蘋果全球有16.5萬名員工只係少數， 究竟會係堅持三日工作制，定係從此彈性上班，對市場嘅影響好大。
美股、外匯、加密貨幣免費即時報價，自選投資組合獲取相關新聞提示。
因為蘋果係2020年最早主張員工喺屋企工作嘅公司，蘋果並唔係一間純粹軟件公司，當中仲有硬件，冇咁容易在家工作，當時亦容許員工在家工作，結果令無數美國科網企業跟隨，直至最近先有公司例如Tesla（TSLA）要求員工返辦公室。
奴性指標 直接影響租金
成件事以香港人奴性重嘅反射神經，就會覺得三天工作制已經好難得，如果無限唔使返Office就更加過癮。對資本市場來講，就會有好深遠嘅影響，直接有如辦公室租金，現時三天工作制，某程度上辦公室可以行共享辦公室 Hot Dask模式，變相唔一定要長租辦公室，辦公室亦唔使人頭枱，如果蘋果帶頭永久彈性上辦公室，長期唔需要辦公室，變相租金上升壓力就有限制，唔能夠好似疫情前咁無止境上升。辦公室租金就會變成一個地區嘅奴性指數，奴性高就唔該返多啲Office，最好喺公司住；奴性低就另一方向。
另一大趨勢係軟件股，主要係由網絡保安股衍生嘅在家工作程式組合，因應唔同公司嘅保安程度，需要有唔同嘅系統支援，幾乎現時已經確認咗在家工作潮流，一個星期起碼兩日，現時只係睇會否加碼，即係每開一個新嘅head count，就要訂閱一系列嘅保安程式等等軟件，嗰類嘅資產組合由疫情高增長股將會變成經濟增長受惠股，當然cut head count就會訂少啲。
再間接一啲，就係對家居嘅要求，以前屋企辦公地點越近越好，屋企大部份嘅機能就係瞓覺，瞓醒返工，所以studio都冇問題，如果在家工作時間長，辦公室擺咗喺屋企，簡單如炒股票都要兩三隻Mon，基本辦公室配置起碼都要一間細睡房嘅大細。
節省咗嘅交通時間留返喺屋企，變相提升在家生活水平，即係可以買遠啲但係大啲嘅樓。過去兩年美國樓市趨勢已經反映咗，城市升幅冇成交升幅咁高。
合理懷疑，上述要求更具彈性上班嘅發起人過去一年買咗樓，而且比起辦公室距離較為遠，所以要返三日工對佢來講好遠，要穿州過省。
2020年市場大扭曲炒爆科技股一樣，不先進國家有幾日WFH已經係恒常化，蘋果嘅員工政策，爭在係返幾多日，將會產生一個長遠趨勢。
最後，大家可能見本欄成日話奴性奴性，其實奴性係雙向，一方面可以理解為服從性，另一方面則可以從自發性出發，如果自發性夠，控制狂嘅公司管治方式，其實唔太適合某啲員工發揮，亦都接受唔到。所以奴性，係可以自發咁改變。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
