笑到最後｜新加坡崛起 點樣炒返轉？（高明）
笑到最後｜新加坡崛起 點樣炒返轉？（高明）
有位居住新加坡嘅Uncle話，新加坡好忙，條街好多人，乜外國人都會湧過去。
新加坡崛起，相信係近半年香港最關注嘅長期話題：渣打馬拉松，喺新加坡搞；皇家加勒比海郵輪（RCL）郵輪留喺新加坡；各類展覽喺
新加坡放題式展開；仲有隨手搞個金融科技周，差啲令到同一時區其他金融會議搞唔成。
美股、外匯、加密貨幣免費即時報價，自選投資組合獲取相關新聞提示。
中文有一個好虛嘅詞語：「國運」，既冇用GDP去量度，亦無關注國民嘅收入生活水平，本來呢個字係無定義隨口講，點知見到新加坡近日排倒海嘅利好消息，就會明白國運好係點樣嘅狀況，就係冇特別努力，但啲生意自己湧埋嚟，瞓喺度都贏嘅狀態。有位居住新加坡嘅Uncle話，新加坡好忙，條街好多人，乜外國人都會湧過去。口講雖然覺得煩厭，但心底𥚃都肯定覺得新加坡好正，因為冇乜點用力。
身為香港人，地域只係邊界，炒賣先係真理。明顯新加坡人才同資金自動送上門，一個地方有是旦一樣都發，何況兩者兼得，坡股樓，應炒邊樣？
先講股，新加坡股市今年8月，上市公司數目為659間，市值8844.55億坡元（6,283.43億美元，約等於巴郡（BRK.B））；相對香港同期2,577間上市公司，35.6萬億港元（4.54萬億美元，約等於兩間蘋果（AAPL））。要話新加坡股市好好炒，某程度同香港有啲似，都係地產金融，再加啲中資股，嗰邊地理關係，都會有馬來西亞集團。
規模就肯定係港股更好，但係正如上面嘅市場規模比較，成個市場一去到美股就變成一間公司，最多兩間，連港股都覺得選擇少嘅情況，好難會覺得坡股會好適合炒。
樓市重稅 股市有優勢
至於坡樓，睇報紙講近期香港人移居西方國家，有評論指西方世界稅重，唔好去買樓，有資產增值稅。新加坡外國人買樓，100萬坡紙33%印花稅，100萬坡紙以上，34%。用同一把呎，都唔應該去新加坡買樓。
買簡單本應買海峽時報指數ETF，不過美股上市ETF都係亞太區捆挷，多數都會有同區其他低迷股市嘅股份，唔能夠專注捕足新加坡崛起概念。一係疊埋心水喺新加坡交易所買SPDR海峽時報指數ETF，用某啲國際級嘅證券商，其實唔難。
如果得港股美股戶口。過去一年，一百隻最伏股票之一，肯定有Sea Limited（SE）份，東南亞騰訊，今年股價下跌73%，2021年10月歷史高位372.7美元計，股價大跌86%，食正強美元+科技兩大利淡新興市場科技股元素。咁樣嘅跌幅，疫情後任何一個位買，都要輸錢。不過，隨住新加坡崛起，香港反應快，美股市場仍然未感受到，美國仍然講緊通脹無心理世界其他事，錢同人湧入，連帶東南亞泰國馬拉都食一轉，Sea應該遲早反映新加坡崛起嘅制度優勢。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
