笑到最後｜英國能源危機到頁岩氣（高明）
笑到最後｜英國能源危機到頁岩氣（高明）
成個市場以至一般生活需求，都被石油、天然氣價格，以及電費影響。
今年可以話係傳統股升、科技股降嘅一年，唔止係股價上落嘅簡單結論，而係成個市場以至一般生活需求，都被石油、天然氣價格，以及電費影響。油價、能源價格
透過通脹影響到聯儲局議息決定，以及國策，從而影響股市，從而影響科技股。
美股、外匯、加密貨幣免費即時報價，自選投資組合獲取相關新聞提示。
能源、食品呢類原料係基本需要，而科技網絡加密幣等就係滿足絕大部份基本需要後追後更好生活嘅產品，冇話邊樣重要啲，淨係有電但冇得上網好多人都想死，但冇電就電話都開唔到，更遑論睇手機、用手機支付程式。越係和平，越追求科技；相反世界開始亂，就會回歸基本嘅生活需要。本欄祈求世界和平，但現世似乎只有不斷祈求，或者先有可能達至和平，此乃後話。
俄羅斯國企Gazprom關閉輸氣往歐洲嘅北溪天然氣管道，天然氣星期一又升三成，前年Meme股嘅波幅，今年竟然喺主要能源上面發生，世界真係諷刺。另外油組亦宣佈10月起每日減產10萬桶油，國際期油上升至96.75美元一桶。
最大影響當然係眾所周知嘅歐洲，因為主要天然氣來源之一係俄羅斯，佔35%。近年更多香港人搬到英國居住，本港嘅傳媒更加關心英國嘅價格變動。資料顯示，英國純一半天然氣嚟自北海，三份一嚟自挪威，38%嚟自歐洲，俄氣經歐洲一路入英國，估計佔3%，論供應，其實唔會太受俄羅斯武器化天然氣供應所影響，但係就受國際油價影響價格。即係話，最嚴重嘅德國，有可能冇錢冇氣用（據講今年已儲備咗85%），英國情況次之，有錢有氣用，冇錢都有得用。
最新英國換首相，卓慧思上台，較少報道佢對頁岩油嘅睇法，因為英國石油危機，再加上最近公佈嘅上調電費上限，市場對佢會唔會借能源價貴而批准開探頁岩油氣有憧憬，英國上市嘅小型油氣股亦都因此炒起。
頁岩氣存成本問題
頁岩氣開深靠水力壓裂（Fracking），第一有成本問題，據報30至50美元一桶油先收支平衡，當然亦有說美國高速發展十年現時成本更低。至於英國，有4個地方有頁岩油，分別係英格蘭西北部Bowland–Hodder、蘇格蘭Midland Valley、英格蘭南部Weald Basin同Wessex，存量嘅估計差異好大，冇實質生產紀錄，所以冇人會知，亦可能有好多但技術及經濟上開採唔到。
水力壓裂嘅環境問題、水質、地震等嘅衍生問題亦係咁多年嘅壓力，寧願買返嚟都唔開採。如今和平不再，先有契機開採。正如本欄經常講，新能源之母，就係油價太貴，所以先由咁多太陽能風電及電池股大家炒。過去十年，英國都冇幾多樣嘢令世人興奮，今次歐洲能源危機，如果逼到英國稍為開發頁岩油，而評估過後係可以開採，或者會帶嚟一個英股長達十年增長嘅板塊。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
