【平民投資教室】錢俊：買新加坡對沖港股有無得諗？
平民投資教室
日期：2022-11-29
更新時間：10:30:33
今年好多人認為新加坡搶曬香港嘅生意成為嬴家。有人因此問錢俊有無得介紹嚇新加坡嘅ETF。新加坡交易所今年中公佈咗2022上半年交易額最高嘅10隻ETF，大概可以了解
到當地有咩好買。有趣嘅係，當中只有四隻係股票ETF、另外債券及非股債資產各佔三隻。
股票方面，兩隻係追蹤「新加坡恆指」海峽時報指數嘅ETF，一隻係標普500嘅ETF。仲有一隻，竟然係恆生科指ETF。債券部份，有一隻係買新加坡企業債，另外兩隻分別係亞洲美元高息債及中國國債。要知道其實亞洲美元高息債入面，包括好多中國企業債，包括內房債。呢個結果側面反映其實當地投資者對中國公司其實興趣都幾濃厚，看似有啲隔籬飯更香嘅感覺。
另外三隻，包括兩隻房地產信託ETF。喺香港，房託最出名就只有領展，但新加坡股市就反而靠呢樣嘢食糊，係亞洲日本以外最大嘅房託市場。最後一隻，係SPDR金ETF，喺香港都有得買。
事實上新加坡ETF選擇唔多，跟據新交所網頁，現時新加坡只有57隻ETF喺當地上市。相比香港，港交所網頁就話有超過150隻，如果計埋唔同貨幣櫃台則有超過250隻。而且相對買港股同美股，俾香港投資者買新加坡股票或ETF嘅渠道的確少更多，倒不如係美市ETF中尋寶。
EWS：新加坡股市的困局
咁香港投資者想買新加坡股票嚟對沖又有無得諗？如果唔喺新加坡市場買，就只有美市呢隻iShares MSCI Singapore ETF（US:EWS）。成份股包括星展、華僑同大華三大以獅城為總部嘅銀行，另外仲有「新加坡騰訊」冬海集團（Sea）及新航等等。
話雖新加坡搶曬區內啲生意，但其實今年基金表現都唔見得好，年初至今跌18%，與美股標普相若。但個個都知美股過去10年都係長勝將軍，但EWS過咗10年總回報仍然蝕緊5%，似乎同恆指都係難兄難弟。
若果要搵原因，似乎都係同基金組成部份有關，又或者話反映新加坡上市公司選擇太少。上述三大銀行已經佔成份超過40%，第二大板塊係房地產，當中唔少係房託。呢類企業係較為成熟嘅公司，往往被講成為價值股或派息股，過去多年以科技股為核心嘅增長股當道，難有發圍空間。咁買嚟收息又得唔得？EWS息率為2.6%，相對標指VOO嘅1.2%及盈富基金3.7%而言，高不成低不就，倒不如直接買房託ETF更為實際。站於長線投資而言，新加坡股票投資價值唔及美股高，值搏率又低過中港股票，感覺頗為雞肋。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
