笑到最後｜如何迎接2023年美股大反彈？（高明）
笑到最後｜如何迎接2023年美股大反彈？（高明）
研究指中期選舉如出現兩黨分權，標普一年回報為13%。
自從本欄喺金融峰會前寫三招救港股，恒指今年見三萬點後，港股就由低位反彈。雖然咁精采嘅三招不幸無一招被採納，但相信同峰會與會者來港，熄
咗VPN後搜尋港股貼地新聞，google翻譯一睇本欄目標三萬點，從而導致港股低位反彈。除咗呢個原因，本欄搵唔到第二個更有力嘅理由囉！
美股外幣即時報價 多國新聞任睇
至於美股，因為已經開始反彈，而且有往績係神奇之地，跌低咗，起得番身，唔同其他未開化市場，所以都唔使咩三招救市。話分兩頭，個市係美國佬自己透過加息令股價大幅下跌，減息就會升返，真係單眼佬都知，爭在聯儲局及有份左右決策嘅人想唔想咁做啫。
持久力勝港股
用船堅炮利角度，求其畀啲武器烏克蘭已打到世界第二軍事強國全國動員；用消費者角度，生活嘅底面都充斥住美國嘢；用創新層面，大部份第三世界國家嘅創科，意念都係嚟自美國成功咗嘅企業，返去第三世界複製並改良，雖然有啲往後「假貨比真貨好」，但係燃點火花嗰刻喺邊度發生，大家都知。
如果美股真係好似早前流傳咁從此沒落，相信其他市場都會失去創意嘅源頭，好運少少好似香港咁，有一堆尋租股支撐，利用政策優勢持續喺特定市場入面屈機，尋租意味低競爭，喺入面被屈嘅人會慘啲，但股市係非道德場所，升就係合理。
點解咁有信心2023年會大升？研究指中期選舉如出現兩黨分權，標普一年回報為13%，而悲觀情緒新高、現金持倉海嘯後新高等，都係基本理由。
更重要係：港股都升，即係等於投資者對風險容忍度大大提升，可能短期爆發力港股會較強，但升得夠持久一定係美股，因為當地係自由行聰明資金、子女、國籍嘅最終停泊處。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
