【平民投資教室】錢俊：中港股終於有望今年跑嬴美股
平民投資教室
日期：2023-01-10
更新時間：10:23:44
上周淺談完美股。今次就講中港股。美股面對加息同經濟衰退陰霾。但中港市場則反而較為樂觀，由上周開始嘅反彈已可見一班。
過去兩年中港市場都係表現惡劣。如果睇一睇過去兩年
跌嘅原因，前年跌係因為監管政策導致以阿里巴巴為首嘅科網股帶頭向下。而上年嘅跌市就以恆大爆煲揭開房地產風暴嘅序幕，加上清零政策不時出現封城收緊社交距離等原因，對市場一沉百踩。喺經濟又響喪鐘，商業活動又難以計劃，企業自然唔想發大嚟搞，蝕少已經當嬴。股市當然都唔會好。
至上年年尾股市開始起跑。清零政策已經無再被提起。同時二十大後，顯然國內政府官員嘅論調已經係輕疫情，重經濟。除咗上年尾及今年初對房地產業嘅支持政策，市場亦憧憬人行會繼續減息降準。近日再傳出已拖延數年嘅螞蟻金服上市可能重啟。全部都俾到國內企業對今年可以重振雄風嘅信心，加上放寬造成消費大爆發，今年企業盈利可望非常正面。
當然有人認為美國加息及全球經濟衰退仍然對中港市場構成影響，畢竟影響整個投資氣氛。但其實好多之前要走嘅外資都已經走得七七八八。若果國內投資者唔再水緊，北水流入就有機會主導大市。
因此若果仍以美股及中港股做膽嘅投資組合，美股較低嘅波幅可以分散風險，配合中港股，進可攻退可守。五五比嘅分配雖然進取，但亦唔過份。
EMXC：新興市場走中資股
若果你仍然對中港股票缺乏信心，但又想投資新興市場嚟分散投資美股風險，較為出名嘅美國上市ETF有iShares MSCI Emerging Markets ex China ETF（US:EMXC）。顧名思義，就係一隻無投資中港股票嘅ETF，主要投資地區包括21%印度、20%台灣以及16%韓國，另外都有投資南美、非洲及中東等地區。
成份方面，金融及科技兩個板塊各佔約25%。較為出名嘅公司包括台積電、三星、印度電訊公司Infosys及銀行ICICI等等。管理費為0.25%。
喺傳統新興市場指數入面，中國一向佔最大，上年亦因此拖累整個新興市場表現。投資EMXC有助睇好新興市場嘅同時又可分散過份投資中國嘅風險。但當然唔好處係若果中港股票大反彈，缺少呢個市場就會跑輸好多。若考慮EMXC，宜另外再投資部份中港股票嘅ETF或股票，可以按市況及個人觀點自我調節可加可減。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
