據《金融時報》報道，中國為加強監管大型科網企業，正著手向阿里、騰訊本土子公司實施「黃金股」安排。
息魔露疲態！美國上周四公布2022年12月通脹數據，CPI按年升6.5%，比11月嘅7.1%明顯放緩，係連續6個月放緩，兼係2021年10月以嚟最低；按月更跌0.1%，係2020年5月
以嚟首次下跌。剔除能源同食品嘅核心CPI，按年升5.7%，亦比11月嘅6%放緩，係2021年12月以嚟最低；按月則升0.3%，比11月嘅0.2%略高。CPI按年升幅符合預期，按月更出乎意料轉跌；核心CPI按年、按月都符合預期，數據意味聯儲局有可能進一步放慢加息步伐。
美股外幣即時報價 多國新聞任睇
利率期貨顯示，市場預期聯儲局下次議息（香港時間2月2日淩晨3時公布結果），加息幅度收窄至0.25厘嘅機會率，由CPI數據公布前嘅77%升至95%。今年有貨幣決策投票權嘅費城聯儲銀行行長Patrick Harker、上年有投票權嘅波士頓聯儲銀行行長Susan Collins，齊聲支持只加息0.25厘。美股連日炒上，上周五，三大指數收升0.3%至0.7%；美滙指數一度跌穿102關，收102.18；美債孳息回順，10年期債息由即市高位3.514厘回至3.498厘收市，2年期收4.2237厘。
美國周四觸債務上限
要留意係，美國CPI按月轉跌，唔代表就快轉向減息，一來今次受能源價格下跌影響較大，而能源價格較波動；二來核心服務通脹仍高。就算首季停止加息，最終利率水平會停留更耐。美國通脹暫時過關，但嚟緊仲有一道關口要過，就係政府將於周四觸及債務上限，財長耶倫敦促國會，盡快提高上限以免債務違約。不過，睇掌控眾議院嘅共和黨嘅分裂情況，議案能否過關成疑，一旦出事，金融市場難逃一跌。
講返港股，上周五再創半年新高，高見21770，收21738，升1%；夜期高水121點；港股ADR比例指數高水175點。恒指不足兩個半月累升超過7,000點，反覆尋頂趨勢持續，本周有機挑戰前頂上年6月尾高位22500水平阻力，首個支持為1月6日低位20800水平，重要支持為上年10月尾以嚟嘅上升軌同20天線滙聚嘅20200水平。不過，恒指經過一輪升浪，14天RSI早已呈超買，有回調風險，小心大戶高位派貨。
國資入股有辣有唔辣
港股上周五早市牛皮，午市借阿里巴巴（9988）、騰訊（700）子公司「國有化」消息炒上。據《金融時報》報道，中國為加強監管大型科網企業，正著手向阿里、騰訊本土子公司實施「黃金股」安排。「黃金股」安排涉及收購網企主要實體1%股權，以便對其業務喺決策上擁有特權。根據商業記錄，國家投資基金轄下實體喺1月4日收購阿里廣州一間子公司1%股權，以加強對其串流媒體優酷同瀏覽器UC Web嘅內容控制。
國資以入股1%嚟監控科網巨企嘅業務，有辣有唔辣，一方面，可能會引起外國針對，例如前年有中國政府背景嘅公司入股字節跳動1%，隨即引起美國議員呼籲政府再禁字節跳動旗下短片平台TikTok；另一方面，科網巨企近年飽歷嘅監管風暴，則有望隨著國資入股而歇息。阿里、騰訊上周五分別升1.7%、2%，兩者美國股價分別較香港高1.5%、0.7%，似乎市場對「黃金股」安排初步受落。
割柑人
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
