滙豐將於2月21日公布2022年全年業績，近期股價急升，一來係估值修復，二來係多家券商唱好前景。
又議息喇！美國聯儲局本周議息，將於香港時間周四淩晨3時公布結果。議息前，重磅通脹數據出爐，上周五商務部公布，上年12月個人消費支出（PCE）物價指數，按年升幅由11月嘅5.5%放緩至5
%，連續6個月放緩兼係14個月最低，按月升幅維持0.1%；剔除能源同食品嘅核心PCE，按年升幅由11月嘅4.7%放緩至4.4%，亦係14個月最低，但按月升幅則由0.2%升至0.3%，反映潛在通脹壓力尚未完全消退。
美股外幣即時報價 多國新聞任睇
PCE數據係聯儲局最睇重嘅通脹指標，12月數據大致符合預期，由於已公布嘅CPI數據同PCE數據同一方向，市場更為關注個人支出數據，12月個人支出按月跌0.2%，跌幅大過預期，11月亦由按月升0.1%下修至跌0.1%。市場一方面擔心經濟減速，另一方面則確信聯儲局會進一步放慢加息步伐。利率期貨顯示，市場押注本周只加息0.25厘機會達98.4%。通脹持續回落，美股反覆向好，三大指數收升0.1%至0.9%。
北水今復流或高位獲利
睇返港股，兔年首周兩個交易日，上周四紅盤高開高收，升522點或2.4%，上周五再升122點或0.5%，收22688，再創近11個月新高；不過，夜期低水29點，ADR比例指數低水82點。恒指喺北水過年截流嘅4個交易日，累升逾1,000點，似已透支今日A股紅盤嘅動力；由上年10月31日低位反彈起計，不足3個月，更累升逾8,000點，升幅達五成半。今日北水復流，不排除高位獲利；加上期指結算，波動難免。
睇恒指技術指標，9天、14天RSI喺1月初已升穿70超買區，上周五更分別升越86、80，當然超買可以再超買，但恒指近期衝得太急，回氣再上更為健康。若短線回調整固，初步支持為上周四上升裂口（22051至22329），重要支持為20天線（現處21167）。上周五恒指50天線升穿200天線，按50天線1月以嚟每日以116點速度上移，一兩周就會升穿250天線，出現終極黃金交叉，到時料會觸發資金追貨。
滙豐買貨動力勝ATM
若大市嚟個似樣調整，可吼位低吸重磅藍籌如ATM、友邦（1299）、滙豐（005）等，皆因大市要升，重磅股必行先。當中，滙豐1月以嚟走勢最淩厲，上周五高見58.25元，計及除淨因素係三年半高位，收57.95元，升0.9%；1月以嚟，累升19.4%；由上年10月12日低位38.5元起計，更累升五成。惟滙豐14天RSI已升穿90，據彭博數據，超買程度係1986年以嚟最高，亦係現時藍籌中最高，反映買貨動力更勝三大中資科網股ATM。據彭博綜合券商預測，滙豐股價未來12個月可升13%。
滙豐將於2月21日公布2022年全年業績，近期股價急升，一來係估值修復，二來係多家券商唱好前景，包括盈利增長、派息增加等。要注意係，美國聯儲局議息在即，若未來暫緩加息令市場對滙豐息差憧憬降溫，滙豐股價可能急回。Anyway，若想趁滙豐股價跟隨大市回調時入貨，可待股價先回調至20天線53元水平才考慮出手，目標價先睇上周五高位58.25元；若估值完全修復，最快明年見70元。
割柑人
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
