平民投資教室 - 錢俊 2023年2月28日

平民投資教室 - 錢俊 2023年2月28日


【平民投資教室】錢俊：擁抱更大嘅房地產信託森林

平民投資教室
日期：2023-02-28
更新時間：13:24:05

上周講完領展供股。事件實在影響太多香港散戶投資者，源於香港人太鍾情於房地產，而且對REIT亦因領展出現變得唔再陌生。奈何香港上市嘅REIT唔多之餘，大部份都係投資本地辦公室同商廈。

過去因疫情，令辦公室及商鋪需求下降，強如領展嘅大地產商更加被政府勸籲減租免租共渡時艱，面對收入減少資產貶值雙重打擊。另外，疫情前好多高級商廈都被國內水漲船高嘅公司搶高租金與樓價，比如中環地標國際金融中心，過去幾年外資投行一遷出，即刻有中資地區銀行進駐插旗，家嚇內地公司紛紛周轉不靈，應該一段時間都好難再見到佢哋搶香港商廈嘅情況。

加上，大眾生活模式受疫情影響而加快改變，好多金融機構依家已經轉曬行hot desking模式，員工與工作檯比例低於一，返公司做嘢都要訂位；網購亦比去實體店舖方便，以往對商業樓宇嘅需求估算模型已經成為過去式。

然而，唔等於買REIT就無價值，一般而言始終房地產波動性比股票低一啲之餘，收息都比較穩定。只係大家買REIT或者可以睇更多唔同類型。比如睇埋其他國家或行業嘅REIT。當中，美國上市嘅REIT更加可以話係百花齊放。

現時美國房地產股息率約為2.6%，比標普500指數息率仍高出1%以上。而且，有研究指超過60%總部位於美國嘅REIT都喺2022年增加定期股息支付。其次，好多比較另類嘅REIT，比如自助倉儲嘅REIT，更加有超過80%年內都宣佈增加股息。

RDOG：分散九大行業REIT ETF
錢俊之前都介紹過REIT都有ETF。今次又睇下ALPS REIT Dividend Dogs ETF（US:RDOG）。買ETF都係求分散投資，呢隻基金喺呢方面就正正做到呢點，投資九個唔同行業嘅REIT，包括寫字樓、零售、住宅、工業、醫療、酒店等，每個範疇約9至13%，唔同行業佔比平均。好多物流及醫療等行業喺資產價格同租金都非常穩定，喺市場波動大嘅時間有助平衡投資風險。派息方面更加做到差不多4厘，雖然唔及領展嘅5厘，但有好嘅分散程度，再相比香港買樓收租得2%嚟講，又唔洗再面對供股問題，完全係理想。

投資有回報都有風險，最擔心始終係樓價及租金回報嘅表現，兩者都有向下嘅可能，因為近日美國因通脹高企問題再次受市場關注，加息及經濟衰退嘅陰霾仍然好大。回報方面，雖然基金今年升約7%；但過去12個月仍跌10%，總算比領展跌17%好。

想聽其他投資Topic？話我知：chinjun.column@gmail.com

FB: chinjun.etf
IG: chinjun.column
以上觀點僅為個人分析，並不構成任何投資建議。

平民投資教室 - 錢俊 舊文

本文作轉載及備份之用 來源 source: http://hksmedia.com