近排港股最熱炒嘅主題，莫過於「中特股」，當中包括內銀股。
近排港股最熱炒嘅主題，莫過於「中特股」（「中國特色估值體系」相關股份），中資石油股、電訊股、基建股、銀行股、保險股、券商股先後落鑊，炒價值重估。不過，喺上交所今日舉辦「發現央企投資價值促進央企估值回歸」業務交流會前，「中特股
」卻喺周二上演高台跳水，為首嘅係內銀股，四大內銀——建工中農，都喺破頂後倒跌，周三繼續回調，再跌2.2%至3.1%，吞噬周一大陽燭。
美股外幣即時報價 多國新聞任睇
港股受「中特股」熱潮暫退影響，繼周二跌2.1%後，周三再跌0.5%，收19762。個半月以嚟，恒指喺19500至20800區間上落，波幅逐漸收窄，兩星期以嚟，喺19500至20300上落，估計短線繼續打牛熊線攻防戰（19700關口），上方阻力為橫行區頂20800水平，下方支持為橫行區底19500水平。值得注意嘅係，內銀股佔恒指比重逾一成，若繼續腳軟，亦會拖港股後腿。
內銀爆升非因盈利改善
講開內銀股，不得不提中國銀行A股（滬：601988）周一爆升10%漲停，睇中行A股歷來走勢，每次漲停，上證綜指後市都係過千點嘅升市：2006年12月28日、29日中行漲停，之後上證喺2007年10月16日見歷史高位6124，恒指亦喺隔日突破30000；此外，2014年11月11日中行漲停，之後上證喺2015年6月12日見歷史次高5178，恒指則喺4月27日見全年高位28588。今趟中行又漲停，中港股市後市點睇？
中行以至內銀股日前爆升嘅主因係「中特股」輪流炒，「中特股」估值便宜、股息率高，一來有望估值修復，二來美國息口見頂，高息股具吸引力。要注意係，內銀爆升背後，並非嚟自盈利改善，42間上市銀行首季收入按年增1.41%，略高過上年，純利按年增2.37%，則低過上年，增長放緩；更甚嘅係，內房債、城投債問題未解決。預計內銀估值重估升幅有限，推升股市難寄厚望。
高息ETF持股多為中特股
揀「中特股」，一切由息講起。美國聯儲局喺上周議息會議加息0.25厘，聯邦基金利率指標升到5至5.25厘，同3月會議點陣圖預測年底利率中值5.1厘相符，係16年嚟最高水平，亦係3年嚟首次重回實質正利率（即利率高過通脹率；3月CPI按年升5%，4月CPI昨晚8時30分公布，執筆時未揭盅）。儲局喺議息聲明刪除進一步加息嘅措辭，暗示6月會議可能暫停加息。不過，唔再加息亦唔會咁快減息，市場仍需面對一段高息時期，唔派高息嘅股份難有吸引力。
「中特股」以低估值、高股息作賣點，背後始終要睇基本面，要有盈利同派息支撐股價，不能單憑概念谷起估值。唔知點揀「中特股」，可揀ETF大包圍，雖然港股市場未有針對「中特股」嘅ETF，但高息ETF嘅持股多為「中特股」熱炒股份。當中，中國平安CSI香港高息股ETF（3070）持有多隻「中特股」，十大持股為中移動（941）、三桶油、四大內銀、神華（1088）、財險（2328）。該ETF今年以嚟累升兩成，跑贏中港股市幾條街。
割柑人
www.fb.com/hkstockpicker
本欄逢周四刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
