【平民投資教室】錢俊：減息將至 債券當炒
平民投資教室
日期：2023-05-30
更新時間：10:24:49
近幾星期港股持續弱勢。大家都係等未來有好壞消息出爐先決定下一步行動。投資者除咗睇定期存款，唔少富裕投資者都轉投債券。
的確，美國過去兩年快速加息嘅步伐近三十年未見。以美國一
年期國債為例，2022年初，息率只有0.4%，今年頭已經升到超過5%。由於幾近零風險，相對於投資股票，有絕對優勢。加上可以隨時買賣攞錢走，有著定期存款沒有嘅資金流動彈性。可以話無得輸。全球投資者都唔係蠢嘅，今年三月，美國一年或以下年期國債銷售額達166達美元，遠高於去年同期24億美元。
咁喺呢個時間應該點買債券？投資債券其中最大看點係債券存續期（Duration）。年期愈長兼派息少嘅債券嘅存續期會愈長，未來息口變化對價格影響就愈大。若投資者相信未來減息速度加快，投資長存續期嘅債券就會較為著數。
另外投資者想買國債有多種方法，各有優劣。若果想自行買債，坊間有投資平台可以自行買入。但首先一手價格可高達10萬美元，之後又有存倉費、收息費等，又要揀唔同年期，投資初哥或者感到有難度。
另外亦可以考慮買債券基金。一般債券基金由基金經理主動地買賣債券及調整投資組合。而好多坊間債券ETF就以追蹤指數被動地買貨，但存續期長短就由指數或基金經理決定。
XONE / XTEN：指定買長債定短債
若果投資者想自行選擇買長債定短債，BondBloxx Investment Management就喺美國市場推出咗一系列唔同目標存續期嘅美國國債ETF，包括八隻由六個月至二十年目標存續期嘅ETF。同時收費由0.03%至0.125%起，絕大部份都比起香港盈富基金嘅0.08%低。同時又可以逐股買入，又省卻買債券嘅一系列費用同麻煩。
至於買長期定短期債好？參考一年期嘅BondBloxx Bloomberg One Year Target Duration US Treasury ETF（US:XTEN）同十年期嘅BondBloxx Bloomberg Ten Year Target Duration US Treasury ETF（US:XONE），前者年初至今回報為1.4%，後者達2.5%，或反映息口轉向利好長債呢點。
美國國債係咪就無風險？一般最大風險就係息口走勢。始終通脹放緩速度仍然難料，美國聯儲局仍有機會改口繼續加息，到時債券就會受壓。近期另一個風險係美國債務上限問題，若果民主共和兩黨傾唔掂數，債券評級機構有機會下調美債「無風險」AAA評級，甚至出現違務違約，到時債券跌幅或可媲美股票波動。唯近日兩黨似乎已達成協議，若國會順利通過方案，短線或將有買盤吸納。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
