利率上升資產價格下跌大家都聽過，對債券影響尤其直接。
兩個月前受社交媒體影響，包括定存KOL唐牛，講開邊個戶口利息多啲，見開戶口冇成本，跟住做。啱啱月頭，開始收到4月嘅利息，雖然並唔多，但由於只係將錢調嚟調去，並冇提升到生產力，而且嗰啲戶口都係活期或者隨時可以提款嘅戶口，連定存延後消費嘅
付出都冇，到收錢一刻仍然係覺得好神奇。
美股外幣即時報價 多國新聞任睇
利率上升資產價格下跌大家都聽過。對債券，影響好直接啦。對樓市，雖然未必直接影響，但係因為銀碼大，大部份人都要造按揭，按揭息率貴咗借唔到錢，買唔起，都會影響樓價。
再對落股票。過去廿年大部份時間都接近零利率，利率對股票影響，都係理論，現實世界根本冇息。當然，上述按揭息率效應一樣應用喺股票，舊年加息得太勁，都要重新思考孖展嘅使用方法。
假設完全零孖展，利率對於股票，本來唔係可以直接比較嘅回報。同買股票股價上落比，利息都只係微不足道，香港現時定存約3至4厘，一隻股一日嘅上落都可以超過一成，放一年等3%，好似好少。
雖則，年息3厘以上，每個月戶口已經開始見到有所轉變，乜都冇做過，連收息股要㩒買入掣落決定並且承擔股價風險都冇，只係將啲錢放喺銀行戶口，下個月頭自動自覺咁畀少少息你（假設係有利息嘅儲蓄戶口，一年定存就要等成年）。
銀行企業一樣可執笠 風險打和
問題係，買股票係有可能輸，收利息輸嘅機會率好低，銀行有執笠風險，發行股票嘅企業一樣可以執笠，呢個風險打和，例如矽谷銀行（SIVB）同Bed Bath and Beyond(BBBY)，都只係成個市場嘅少數。粗略計股價升跌機會率各半，而銀行存款，唔提款係冇可能會下跌，收息係贏梗。以上本來都只係常識，但因為零利率太耐，包容嚇畀高明講少少。
只要銀行存款有利息，一旦買股票輸咗，就會反問自己，究竟做乜手多？相對3厘穩贏，無啦啦手痕輸一成，跟住就會後悔：一、蝕幅需要約三年存款利率彌補；二、如果乜都唔做，起碼都收緊少少月息。利率嘅誘惑，唔係嗰幾厘息，而係第二度輸咗錢後，就會發現原來乜都唔做結果好過做。
香港時間星期四淩晨公佈議息結果，加0.25厘接近9成機會，最新機會率顯示，最快11月先加息，同之前機會率預期「5月加完息6月立即減息」唔同，所以本欄經常強調市場「動態預期」，只可以參考，時間一過又會變動。5厘以上可以話係現代投資嘅高利率。
至於停加息對於股市有冇刺激作用，95年、2000年、2006年、2018年都試過停加息，對股市直接效果並唔一致，兩次升兩次跌，真正升幅都係嚟自危機後大幅減息，危機又完咗，息口又低，股價就升上去。今次銀行危機暫時太弱，未能構成大規模減息嘅條件，一日唔減息，大家期望嘅大牛市，真係未有咁快出現。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
