古星輝 - 5G@綠色旅遊｜乜都5G
今個月沙頭角禁區第二階段開放，吸引好多遊客參觀，而附近嘅紅花嶺早前亦正式成為香港第25個郊野公園。香港綠色旅遊嘅發展越見備受重視，城鄉聯繫亦更見密切，令人注意到喺鄉郊及綠色景點提升5G網絡覆蓋嘅重要性。
香港嘅5G可用度喺歐亞手屈一指，網絡覆蓋超
過9成人口，核心商業區覆蓋率更達99%。但講到要達致無遠弗屆、滴水不漏嘅全港覆蓋，就必須做好偏遠地區，包括郊野公園、村落，以至邊境一帶嘅覆蓋。
主導電訊基建助精準部署
拓展電訊基建需投入龐大資源，鄉郊地勢複雜，人跡罕至，要拓展5G覆蓋，成本極高，須具有力商業誘因及精準部署。
仲記得疫情期間要趕急為隔離設施提供5G覆蓋，當時由政府主導，預先為電訊商提供鋪設基站嘅基礎設施及配套，等我哋可以好快喺啟德郵輪碼頭社區，以及遠至落馬洲河套區嘅隔離設施，迅速完成鋪建流動網絡，為醫護及要檢疫嘅市民提供5G服務，亦適時為緊急5G應用方案，例如機械人消毒及視像分析方案等，提供先決條件。呢種由政府主導嘅有效合作模式，若能套用於拓展鄉郊5G覆蓋，定必有異曲同工之妙。
多年前政府推出「擴展光纖網絡至偏遠地區鄉村資助計劃」，為固網營辦商提供資助，鼓勵佢哋喺離島及鄉郊鋪設光纖，直至去年已擴展至超過150條鄉村，並可望喺2026年完成為所有鄉村鋪設光纖網絡。
相信如果政府能夠同樣為流動網絡商提供資助，就好似之前起隔離治療設施時，先提供所需電訊基建，電訊商喺拓展偏遠地區嘅覆蓋時會較容易入手，即使未來要喺北部都會區、邊境，以至邊陲位置提供5G服務，都定必能事半功倍。
先進嘅5G流動網絡基建，係發展智慧鄉郊嘅必要條件之一，不但有助村民及郊遊人士通訊，對於喺鄉郊應用5G方案，無論係以人工智能加強防洪監測、偵測山火，以至加強郊野嘅康樂配套及教育設施等亦有鼓勵作用。
希望喺當局及各電訊商群策群力之下，能盡快為5G網絡全覆蓋，拼入5G鄉郊最後一塊砌圖，從而加強智慧鄉村及綠色旅遊業嘅持續發展，帶來更多經濟、保育及教育效益。
和記電訊香港行政總裁
古星輝
乜都5G - 古星輝 舊文
本文作轉載及備份之用 來源 source: http://www.stheadline.com
