英格蘭今屆悶波連場但連番晉級，修夫基已升呢做戰術大師。 (James Gill - Danehouse via Getty Images)
歐洲國家盃來到尾聲，決賽將在星期日舉行，由踢法秀麗贏得有說服力的西班牙，迎戰有「戰術大師」修夫基坐鎮的悶波英格蘭。西班牙在分組賽三戰全勝，在淘汰賽分
別擊敗格魯吉亞、德國及法國殺入決賽，遇強愈強6場入13球只失3球，陣中仲有幾位年輕新秀大放光芒，實在係有冠軍相。相反英格蘭分組賽一勝兩和，淘汰賽遇上較弱的對手，但場場都係險勝，有加時又有十二碼，本來陣中粒粒皆星，殺入決賽是意料中事，但表現明顯遠遜預期，普羅球迷認為一味靠運而已。
美股外幣即時報價 多國新聞任睇
贏得有說服力先係叫贏
在足球比賽，從來都會有種意識形態，贏固然重要，但仲要贏得有說服力，踢得好仲要守得穩，否則只會換來敵對及中立球迷的不滿，贏得有說服力先係叫贏，否則都係睇嚇你幾時輸返曬啫。最經典的例子係十年八載前的「怎樣才算贏巴塞」，資深球迷一定記得此惡搞，因為只要在巴塞球迷認可的情況下，才算擊敗巴塞，例如唔准用高波、唔准死守打反擊一定要鬥攻，一定要美斯有態時贏先叫贏。當然這些都係得啖笑，但有時都不禁諗返，足球比賽係為贏波，定係為贏說服力呢，贏到波仲要唔要贏得精彩呢。
NVIDIA貴為當時得令的股王，但很多投資者現時對股王嗤之以鼻，認為股價過份炒作，之後便無以為繼泡沫爆破。 (ASSOCIATED PRESS)
贏錢最重要 泡沫又如何
同樣的事情在投資市場時有發生，NVIDIA貴為當時得令的股王，但很多投資者現時對股王嗤之以鼻，認為股價過份炒作，好生意不能持續，之後便無以為繼泡沫爆破，股價會由太空返回地球，一班股東到時會見財化水。當然揸住股王的投資者，亦會認為無貨又唱淡者全是酸民，看法及論據不足為患，股王市值可挑戰十萬億美元添呀。走勢派常恥笑低吸派愈買愈低，唔識止蝕，最終看錯的話會血本無歸，低吸派就會批評高追者經常止蝕，錯失挨過風雨後的倍賺機會，你睇當年騰訊（0700.HK）及AMZN，何嘗不是先急跌後浴火重生。
廣告
所以與其口舌之爭，不妨慳返啖氣好好做功課，贏錢同贏波才是最終贏家，如果英格蘭贏到冠軍，相信三、五、七年後無人會記得佢哋場場悶波；如果NVIDIA（或其他AI股）幫你贏到第一桶金，相信你亦不會介意這個AI浪潮是否泡沫，能否改變人類命運。千萬不要學咗修頓阿叔、維園阿伯咁，只識在場外指指點點，滿口大道理，但到你落場時就豬一樣，輸錢就諸多藉口，因為外資惡意沽空雲雲。
最後要利伸返，本人係支持西班牙奪冠及NVDA go go go的，嘻嘻。
青冰
http://www.fb.com/chingbing888
本欄逢周五刊出
大茶飯 - 青冰 舊文
本文作轉載及備份之用 來源 source: http://hk.finance.yahoo.com
