古代講積穀，現代講積蓄，尤其要儲定啲收息股。 (gremlin via Getty Images)
早前筆者非常尊敬嘅師長喺社交媒體貼文，憶起七十年代銅鑼灣豪華飯店內嘅對聯：「大包易賣，大錢難撈，針鼻削鐵，只是微中取利；同父來少，同子來多，簷前滴水，何嘗見過倒流。」七十年代係香港經濟
起飛嘅年代，似乎大眾已經意識到傳統思想「養兒防老，積穀防饑」中嘅「養兒防老」已out，變成「老豆養仔仔養仔」，老來只能靠「積穀防饑」。古代講積穀，現代講積蓄，尤其要儲定啲收息股；而揀收息股，一字記之曰：穩，業務要穩健、派息要穩定！
美失業率超預期 強化減息憧憬
講揀股前，先講下市況。今年係環球大選年，繼俄羅斯、印度、南非、墨西哥、歐盟喺3月至6月舉行大選後，上周四輪到英國，工黨一如預期大勝，終結保守黨14年執政，英國金融市場反應淡定，富時指數上周四升0.9%，上周五回吐0.5%；至於市場最關注嘅美國大選，11月舉行，前周上演首場電視辯論，睇嚟拜登將要走出白宮走入老人院，美國金融市場無受驚嚇，上周五更因失業率高過預期強化減息憧憬，道指、標指、納指分別升0.2%、0.5%、0.9%，後兩者更再創新高。
但納斯達克金龍中國指數表現迥異，跌2%；港股ADR比例指數低水67點或0.4%。事實上，港股喺本港交易時段已轉跌，4日升勢斷纜，收17799，跌1.3%；內地滬深300指數更已連跌4日。人民銀行上周一預告，將向一級交易商開展國債借入操作，事隔4日，《彭博》上周五引述人行回應，已與幾家主要金融機構簽訂協議，共可借入數千億元人民幣中長期國債，將視乎市況借入並賣出國債，平抑過熱債市。市場擔心，若人行沽債，勢將吸收銀行間流動性，變相令流動性減少。
廣告
恒指自5月20日衝上19706後，沿下降通道輾轉回落，近一個月打18000關防守戰，上周五再得而復失，喺冇乜利好消息刺激下，預料繼續整固，首個支持位睇牛熊線17500水平。纏繞港股嘅一大因素係美國息口，美息預期則隨著飄忽嘅經濟數據而飄忽，最新就業數據出爐，9月減息憧憬升溫，利率期貨顯示，機會率由前周嘅57.9%升至上周嘅72.2%。減息在望，息口敏感嘅收息股吸引力回升。
中移動既有中特估（中國特色估值體系）槪念，又有AI（Artificial Intelligence，人工智能）槪念。 (Xinhua News Agency via Getty Images)
中移動高息之餘 亦添AI槪念
講返儲收息股養老，如上文所述，要揀業務穩健、派息穩定嘅股票，例如公用股。公用股營運公用事業，有穩定現金流、收入同利潤，可持續穩定派高息。港股藍籌股，不乏公用股，除咗兩電一煤——中電（002）、煤氣（0003.HK）、電能（0006.HK），仲有持有電能36%嘅長建（1038.HK），以及筆者愛股中移動（0941.HK）⋯⋯等。中移動係內地最大電訊商，睇首季業績，純利係同業中電信（0728.HK）嘅2.44倍、聯通（0762.HK）嘅4.28倍，收入係中電信嘅0.95倍、聯通嘅1.65倍，三大中資電訊股中收息最可靠。
此外，中移動既有中特估（中國特色估值體系）槪念，又有AI（Artificial Intelligence，人工智能）槪念。前周，董事長楊傑喺「2024年世界移動通信大會」上表示，將推進三個計劃，即「AI+」行動計劃、「BASIC6」科創計劃、「兩個新型」升級計劃，包括新型信息基礎設施升級、新型信息服務體系升級；上周，楊又喺「2024年世界人工智能大會」上表示，將推進「AI+」作為戰略著力點，以升級網絡、建立「九天」大模型矩陣、打造AI原生應用。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
