關志康 - 給小費 潛規則 得罪人 | 神耆商機
早前有位老好人分享一次尷尬經歷：「前日飲酒飲到深夜，有幾位靚女話要先走，但我司機又收工了，加上我和其他人都未想走，冇辦法送佢哋。最後佢哋話可以自己叫車走，於是我就每人派了500蚊『的士錢』。點知班靚女當場黑面、拎袋走，場面十分尷尬
，佢哋自此也『拉黑』了我。」
「派錢」有打賞的意味，往往對象都是低下階層和服務提供者。另一位老前輩聽罷「教路」：「班靚女係律師嚟，你估係『揼骨妹』？我就醒目過你啦，我會特別將錢放入利是封，再話『今日我生日，所以派利是囉。』我日日都開心，咪日日都生日，哈哈哈。」
有老闆調侃：「我『親家』經常袋著一疊廿蚊，飲茶時派給夥計。我就闊綽少少，派『紅衫魚』，當同大家打打氣。現時都是電子支付，邊有機會畀『貼士』？呢啲真正『塞』錢入佢袋，絕對是『老餅』的智慧，後生就唔識。」事實上，有調查發現，「嬰兒潮世代」出生的「老人家」，在給小費方面比「Z世代」的「小孩」更為慷慨，而且越來越多年輕人覺得無需要給小費予維修技工、送外賣人員、的士司機等。
此外，給貼士也分地域。在北美，給小費是根深蒂固的社會規範，其中餐廳消費通常會額外多付15%至20%的服務費；相反，在中國和日本，社會普遍認為服務是從業者的本份，額外打賞反而顯得突兀，甚至可能被視為動機不純，以致冒犯。一位上海佬笑言：「香港地想使人做嘢，肯定要多打賞。『潛規則』要記住，派遣的普通話，咪就是『派錢』囉！」
健康教育基金會主席
關志康
神耆商機 - 關志康 舊文
本文作轉載及備份之用 來源 source: http://www.stheadline.com
