大師冇點你 - 李聲揚 2025年7月1日
大師冇點你│我買股票從來唔止蝕（李聲揚）
大師冇點你│我買股票從來唔止蝕（李聲揚）
我係一個唔止蝕嘅人——但我講股票，唔係講其他嘢。
美股外幣即時報價 多國新聞任睇
個個講嘅嘢就啱？
呢個做法，經常俾人鬧。因為同多數人唔同，就會俾人鬧。出面個個都叫你止蝕，但諗真啲，個個講嘅嘢就啱？本人另一名句，投資上面，多數人就多數係錯嘅——否則股票唔會係少數人賺咗多數錢嘅遊戲啦，係咪？否則唔會股市長升，但咁多人話輸錢。你可以拗港股唔係長升，但買美股一樣唔少人輸錢。
呢個課題歷久常新，久唔久應該討論下思考下。不如由最簡單開始：點解個個叫你止蝕？唔止蝕又有乜後果？止蝕又有乜壞？
點解個個教你止蝕？好簡單，呢個世界係人雲亦雲嘅。正如無數咁多人覺得股市反映經濟，經濟差股市點會好。介紹返，恒指舊年年頭到而家升咗成1萬點。你係咪覺得經濟好好？
另一樣嘢：你問電視機嘅西裝友又好，真心問有料嘅專家都好，都多數會教你止蝕——點解？好簡單，同你有親咩。唔係話佢點條黑路畀你，但代入佢角色，你都係叫其他人止蝕——因為包冇錯。你唔聽咩，輸大錢，係因為你唔止蝕。你不停止蝕，不停低位打靶咩？唔緊要，至少你輸兩成止咗蝕，唔使輸更多（呢個絶對係謬論，你可以諗下點解）。
唔止蝕有乜後果？之前做節目，有人留言鬧我，話我叫人唔止蝕，輸死人。介紹返，我就講得出做得到，真係唔止蝕。我成副身家買股票。咁我輸死咗未呢？未喎，好快我生日，未輸死。經歷N咁多次股災，我都未死，仲賺咗唔少錢。
咁你話，咁啱你買嘅嘢反彈返啫，如果你買隻啲一路狂跌，甚至total loss嘅嘢，咪會輸死——答得好。所以，當然係要分散！我夠分散，就唔怕total loss。我當然都有個股係輸九成，甚至九成幾都有，你當total loss，我都唔會預回到家。但，有何問題？一隻輸100%，但我其他嘢好多升幾倍。
於是你心諗，咁點解要輸？點解唔只係其他嘢賺幾倍，而避開呢隻total loss嘅？好簡單，因為係一體兩面。呢個亦係叫你「止蝕」嘅人，唔會話你知。
「止蝕」嘅問題 在於你會震走
「止蝕」嘅問題，在於你會震走，亦即係低位打靶，而且走咗你唔知幾時買返，買返又跌一兩成，又止過，根本唔會搵到大錢。4月美股幾日就跌12%，恒指仲勁，一日跌13%，一日跌3000點。任何「止蝕位」，根本全部一定觸發曬。然後你就係低位同人地人踩人，錯過美股兩個月反彈兩成幾，錯過恒指兩個月反彈4000點——更大問題係，你20000點「止蝕」（即係打靶），你好難說服自己24000點再買。然後一路等等等，唔知等到幾時。
而兩三成嘅調整，根本係濕碎。任何一隻股王，升幾十倍幾百倍中間，一定經歷過N咁多次跌三四成。唔信？Nvidia夠巴閉，小弟10蚊買，坐到而家，贏10倍以上，有曬紀錄。但，2022年，隻嘢高位跌足七成。唔止，Netflix 一樣係咁，Meta都係咁。止蝕嘅，你全部低位打曬靶。然後呢幾隻嘢，由2022年低位，全部升返十倍八倍。
我冇勇氣亦都冇錢，在2022年秋天撈底（但今年4月就有）。但三隻嘢我都係2022年之前買，至少我冇低位走去沽。係咪有人想問，點解唔跌兩成嗰時沽咗佢，然後跌七成先買返？你做到嘅，你話我知，我拜你為師。
認真，關於止蝕，有句名句，係傳奇基金經理彼得林治講嘅：佢話，股價跌唔需要止蝕，除非真係基本因素變咗，最初買入嘅原因不存在。
我100%認同，問題係：點判斷？極之咁難。股價跌得七成，好少無緣無故。Meta當時收入真係大跌， Netflix上客少咗，Nvidia一樣業績走樣（嗰時未出現ChatGPT）。
所以你如果話「基本因素變咗，就要止蝕」，我會認同。我亦相信有人判斷到—— 但百份之九成，甚至百份之九十九嘅人都唔得。咁你係咪覺得自己係天選之人？不妨睇下自己戰績。
又或者，退一千步。至少坊間講嗰啲「嚴守止蝕」，跌10%跌20%就要沽，絶尌係荒謬。再講一次，我從來都唔止蝕，冇輸死，你睇到呢篇文時我生日，百無禁忌。
又或者，退一萬步，可能我以上講嘅嘢未必啱——但真係十個有十一個都叫你止蝕。你有冇去質疑過？我認為至少呢個話題值得思考，唔好人講乜你信乜。
李聲揚
前大行分析員，如今無業遊民，別人恐懼時我貪婪
FB Page︰meatbonetea金融肉骨茶
本欄逢周一刊出
大師冇點你 - 李聲揚 舊文
本文作轉載及備份之用 來源 source: http://hk.finance.yahoo.com
