大師冇點你 - 李聲揚 2025年7月29日
大師冇點你│我唔建議月供巴郡（李聲揚）
大師冇點你│我唔建議月供巴郡（李聲揚）
見social media上面，有小朋友懶叻，走去恥笑人「之前好多人話月供巴郡價值投資」，然後貼張巴郡嘅股價圖。
美股外幣即時報價 多國新聞任睇
但凡小朋友恥笑巴郡 可能就係股災先兆？
成件事相當有趣，首先，我有回覆「好多人？到底係幾多人？」。我可以相當肯定，會月供股票嘅，已經係相當少數嘅人。入面會揀巴郡嘅，更加之少 — 我當然都識，都見過，但肯定唔係「好多人」。網上呢啲「好多人」，根本龍門任搬。
我話你知，咩真係「好多人」？ — 舊年全年，每一個人都講金融遺址，港股已死。香港經濟咁差，股市點會好，然後列舉幾千個睇淡理由。肯定唔係100%，但我可以肯定至少九成言論都係咁。唔信嘅，你自己睇返紀錄。舊年年頭港股15000點，我話見20000，畀人又鬧又恥笑。結果而家港股25000點，升足1萬點。
但講返巴郡。首先，但凡小朋友恥笑巴郡，可能就係股災先兆？對上一次，就係2021年嗰時，人人話畢菲特係廢老，Cathie Wood先係股神。結果股市好快爆煲，應驗咗股神嘅一句，潮退就知邊個唔著泳褲（或者泳衣），而潮退得好快。
拎住巴郡跑輸嘅日子嚟講，梗係得。你剪段片全部係美斯踩波車（好似好少），C朗射波射上觀眾席，米高佐敦射失last shoot，大把啦，咁你係咪可以話「啲人話GOAT，笑咗」？
事實上，巴郡今年大約升7%，根本唔失禮 – 標指都係9%左右之嘛。大多數人冇呢個回報添啦，講就叻。你拎幾千蚊去買meme股就梗係可以幾日升幾倍。但計總回報呢？基金經理都跑輸大市啦。
不過話說回頭，早幾年股神未退休時，都真係有人（唔係「好多人」，係「好少人」）之前問過我月供巴郡，我都話唔好。原因唔係股神冇料到（咁都可以討論？），而係佢年紀問題。股神再勁都好，都係血肉之軀，總有嗰一日。
固然人人都有呢一日，問題係首先股神真係一把年紀。更大嘅問題係，成間公司，就真係差不多買佢一個人。好多人以為其他公司都係，但重要性爭好遠。蘋果教主Steve Jobs死咗就快十五年，新一代可能都唔識佢，但佢死後蘋果股價一樣升咗幾十倍。Bill Gates退下來後，微軟股價一樣狂升。但巴郡好大程度上，真係靠股神一個。交咗棒，就係另一回事。對我嚟講，其實巴郡今年只係跑輸標指些少，已經好難得。
更何況仲有個技術問題：唔止講公司表現，即使講估值，巴郡都係有個好大嘅「股神溢價」。即係乜？即係公司市值，高過公司淨資產。一蚊淨資產，唔止賣一蚊。固然對科企嚟講好平常，幾十倍都得。但對巴郡呢類公司，其實極少見，甚至早年嘅巴郡都唔會咁。
所以，過去幾年，我都建議人唔好買巴郡。咁事實過去幾年多數時間佢都跑贏大市，但投資唔止睇幾年。
李聲揚
本欄逢周一刊出
大師冇點你 - 李聲揚 舊文
本文作轉載及備份之用 來源 source: http://hk.finance.yahoo.com
