笑到最後｜平衡時空的完美炒家（高明）
笑到最後｜平衡時空的完美炒家（高明）
相信每一個投資者心入面，一定會問過自己一句
「如果」。例如2004年買入騰訊（700）IPO後一直持貨至今，又例如如果買第一份麥當勞、第一部iPhone時開始投資麥當勞（MCD）、蘋果（AAPL）。甚至若幹年前睇咗某位黑人YouTuber叫大家至少買10美元Bitcoin，聽咗乖乖哋照做。
美股外幣即時報價 多國新聞任睇
假設可以再買過 結果會否唔同？
世上究竟有冇一個完美嘅炒家，成功咁投資買中所有10倍股、百倍股，然後升到高位出售，再轉去另一隻新嘅10倍股。
退一萬步，假設若幹年後科技發現，成功有下一位天才發明時光機，令人可以帶住現有嘅記憶同經驗返過去，假設你可以返2010年再買過，知道曬Bitcoin嗰啲會升，又可唔可以一樣修成正果？
情境一：理想中的完美投資者
假設投資者能夠嚴格按照未來記憶執行投資策略，於2010年當Bitcoin價格處於0.06美元至0.30美元水平時大量建倉。以當時價格計算，即使投入相對較少的資金如一萬美元，起碼買到3.3萬粒Bitcoin。按理論推算，若能持有至今年高峰期約12萬美元水平，至今接近40億美元。然而，此情境忽略了早期加密貨幣基建的技術風險，包括唔見ColdWallet HardDisk或密碼普遍問題、交易所倒閉事件。現實中，即使擁有完美的市場預知能力，技術性風險及市場結構性問題仍可能一次清零。
情境二：人性弱點的現實投資者
儘管對未來市場走勢完美認知，投資者仍需面對人性弱點在極端市場波動下的考驗。以Bitcoin歷史價格軌跡為例，2011年由高峰32美元暴跌94%至$2，明知佢第日升返，持貨力不足可能內心另一個「超我」會話3毫子貨都大賺，不如沽咗佢去玩。其後2013年升穿1100美元後再度回落至200美元水平，以及2017年接近兩萬美元歷史高位時獲利嘅誘惑。行為金融學研究顯示，即使理性上「知悉」長期趨勢，投資者在面對實際的帳面虧損及市場恐慌情緒時，往往會作出與原定策略相違背的決定。現實上去到 2017年社交媒體資訊已經失控，跌時一味叫「跌跌跌跌跌」，唔一定把持得住，情況有如明知唔應該演唱會公眾場合同情人攬頭攬頸，但有時都忍唔住。
情境三：槓桿放大的貪婪陷阱
本欄認為最大機會發生，甚至應用喺其他任何資產，當投資者確信Bitcoin升過萬倍，回到過去，唔孖爆對唔住自己。既然「確定」Bitcoin會由2010年的0.30美元升至12萬美元水平，不如轟轟烈烈做全球首富。然而，以2011年Bitcoin由32美元暴跌至2美元為例，即使僅使用5倍槓桿，投資者亦會面臨強制平倉。即使擁有完美的市場預知能力，低位孖爆都可能輸突破產。
每一個事後認為未盡人意嘅投資決定，必定係出於經驗、知識、心理、運氣等嘅不足，即使平行時空都唔會有完美嘅投資者，搵埋奇異博士博你透視可能性，幾百萬個情節都未必有一個可能性係完美投資者。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
