金融High Tea——變局在前
2012年8月22日
■中海油公佈中期業績，純利318.7億元人民幣，同比減少19%。圖為主席王宜林。
■康師傅早前公佈中期純利升24%，勝過市場預期。
昨日港股相當玩嘢，以20112點開出後先急插，跌124點後一個V字咁抽高至全日高位，然後近中午開始一跌回，回番去早上的高位，再來第二個V字慢慢彈番上去，結果兩輪大上落，指數只跌4點，收20100點，成交430億元。
中環茶友話，呢啲市睇結果無嘢，但你去炒好易企錯邊，俾人打完左邊，打埋右邊。講好啲係好淡爭持，有人睇好有人睇淡，在19900點和20170點中間走動。講衰啲係大戶趁住成交較少，舞上舞落食盡波幅。個別板塊好似消費股，就受惠市傳內地年內推促消費新政刺激，好似隻國美(493)持續攀升，曾高見0.74元，勁升16%，其他內地零售同消費股都有炒作。
我都好怕呢啲市，因為大戶跟本睇住散戶食，多人造好就插，多人造淡就夾，昨天早上半小時一個V字急上急落，快得驚人，殺咗唔少散戶。不過大家留意，愈來愈近月底，仲有一個星期就期指結算，變局就在前面，可能要向上或向下突破，走出一個方向，俾大戶食到盡。
阿爺大幅放水
開始好多香港水炒內地市，A50中國基金(2823)由月初至今增加咗3億個發行單位，有2、3％溢價，而且成交經常好大，昨日成交7.8億，升0.4％，收9.53元。A50基金要有咁大需求，才可以增發咁多單位，睇嚟流入去炒的都唔係散戶，好可能有機構投資者入場炒作。
內地股市反覆尋底，上證綜指前日連2100點大關都跌埋，昨日升0.5％，收2118點，皆因人民銀行在公開市場進行2200億元人民幣的「逆回購操作」(即送水入市場)，是單日最大的逆回購金額，阿爺放水頂高咗內地的金融、保險股。
我估8月過咗三分二，阿爺睇住經濟條數，覺得力水未夠，所以就大手筆放水入市場，水淹三軍頂住經濟。外資見美股咁高內地股市咁低，又見阿爺不斷郁手，所以買番少少贈吓興。若然如此，港股未來都繼續睇高一線，向上炒機會大少少。
借業績玩走位
昨日個股都繼續順住業績炒，帶動恒指最多的是升6％的康師傅(322)，帶動恒指升10點，中海油(883)跌3％，帶動恒指跌27點，兩者升沉全是業績使然。近日好多公司會公布業績，部份股仔開始偷步炒上，但由於公佈業績太多，股民眼花繚亂，好多人就等成績表派完先至郁手，相信呢類走位沽揸的遊戲仲會玩多陣。
康師傅早前公佈中期純利升24％，賺2.8億美元(約22億港元)，勝過市場預期。主要原材料價格稍降，令整體毛利率升3.7個百分點，升至29.8％。
評級機構穆迪話，即使內地經濟放緩，但康師傅維持速食麵維持市場領導地位，集團今年上半年收入仍錄得增長15.8%。另外集團仍在整合百事中國的瓶裝飲品業務，期內飲品銷售溫和增長4.7%。雖然市場弱，但集團仍能在內地汽水市場增加份額。今年上半年業績表現反映其強勁的市場地位，穆迪繼續維持其「Baa1」評級，評級展望「穩定」。市場睇好，令康師傅升到39倍市盈率都有得升。
下跌的中海油主要是業績麻麻，佢中午公佈中期業績，純利318.7億元人民幣，同比減少19%，中期息0.15元。油價高，但業績唔好，就咁俾人插低。
陸羽仁
上一頁 下一頁
金融High Tea 舊文
