金融High Tea——磚頭股
2012年8月29日
■嘉華昨日宣佈半年業績，純利28.99億元，按年大增6倍，派息5仙。
內地經濟不斷向下走，但市場期待阿爺推出的救市措施卻遲遲未見影蹤，令入愈來愈擔心經濟真係會出現硬着陸。上日公佈的7月份中國規模以上工業企業利潤，較上年同期下降5.4%。全賴歐美央行呢個星期尾可能公佈刺激經濟措施的憧憬撐住，大市跌唔落去。
全球股民都在眼望望，等待歐美央有乜動靜，唔敢入市唔願沽貨，股市呆呆滯滯。恒指昨日低開75點後橫行，中午內地A股抽高，恒指跟隨跳升90點，收報19812點，微升13點。大市成交再減至360億元。
富士康禍不單行 上證綜指昨日中午忽然抽上，主要原因係內地公佈啟動試行「轉融通業務」，容許內地投資者借錢炒margin同借貨沽空，市場預計將吸引到1200億元新資金入市。包括申銀萬國(218)、海通證券(6387)等11家證券公司已獲批進行相關業務。申銀萬國昨日升1.5%至1.99元。
三星電子專利權官司輸咗畀蘋果公司，除咗要賠償10.5億美元予蘋果外，法庭仲禁止三星8隻產品唔可以在北美發售。搞到三星市值一日內蒸發近1000億港元。
三星大鑊，直接影響到生產Android手機的富士康(2038)。富士康真係屋漏兼逢連夜雨。富士康的兩大客戶諾基亞和摩托羅拉智能手機銷量慘淡，拖累富士康上半年營業額按年大減16.4%，虧損按年擴大13倍至18億元。今次連唯一可以賣得嘅Android都中埋招，前景真係堪虞。富士康昨日勁插8%至2.65元，連20天線都失守埋。
高盛話富士康現價估值接近08年金融海嘯低位，相信目前結構性問題較2008及2009年更差，或墜價值陷阱，公司業務難以好轉，雖然股價等如市帳率只有0.6倍，但叫大家不宜沾手。
三星官司敗訴，有人歡喜有人愁，市場預料全球使用Android系統的手機商都會受打擊，中興(763)股價大跌7%，iPhone供貨商的瑞聲(2018)就大升7.2%。
二線地產股有好嘢
地產股炒完一浸龍頭，開始轉向炒二、三線，又有資金玩尋寶，都係搵啲有資產冷門股落，講到資產，數來數去最易計都係磚頭。
醒目錢轉向炒落後的磚頭股，當然有道理。昨日嘉華國際宣佈業績，中期純利大增，樓價過去兩年持續上升，但市場一直好擔心政府打壓，出現樓價升股價唔升的現象，特別係二、三線地產股最明顯。
當內地經濟好，大家會覺得香港市場太細，做香港地產有幾大「發圍」先？要買要炒不如落注內房股，而家內地退潮，股民避險意識大增，寧願買啲有「揸拿」嘅股份，香港磚頭始終有價，於是吸引資金流入，炒完龍頭又炒優質二、三線。
昨日宣佈業績後爆上的嘉華6月底止半年業績，純利28.99億元，按年大增6倍，每股基本盈利1.12元；派中期息5仙，溢利高增長是來自香港深灣9號項目、上海慧芝湖花園第三期及售賣上海寶地權益。
除咗賣樓收益，集團仲持有銀娛股權，主席呂志和透露，會視銀娛為優質投資，繼續持有該股股份。他又話，上半年業績理想，相信下半年業績亦相當理想，照咁講有貨投資者若唔等錢使，就算食胡都不要太心急。
陸羽仁
上一頁 下一頁
金融High Tea 舊文
