金融High Tea——避險資金無處避
2012年8月3日
■昨日長實公佈業績，股價跌1.1％，收102.3元。圖為主席李嘉誠。
美國聯儲局開會無料到，但留了下月可能還會出招的尾巴，港股結束近一周的升市，首度回落，但跌幅唔算大，昨日由朝跌到晚只跌了130點，收19690點，市場還在等歐洲央行開會，而家市場期望好高，股市頂住不大跌，若開會結果不如人意，後市壓力較大。
阿爺中央政治局周二開會，話下半年定調「把穩增長放在更重要的位置」，內地股市前日彈咗一日，昨日又回吐，過去政治局開會定調都會大炒一番，如今炒一日半日就散水，可見內地股市之弱。
昨日拖累港股的主要是紅色股，論點數只是中移動(941)和中石油(857)的跌幅，已令恒指唔見咗44點，等如下跌點數三分之一，但佢哋的跌幅遠不及內房股，華潤置地(1109)大跌5％，係跌幅最大的藍籌股，中國海外(688)也排第二跌3％。
打樓價不力要問責
早一陣子內房股是強股，呢幾日不斷走樣。五至七月內地地產市場回暖，買樓開始有人排隊，北京又出現地王，樓價反彈向上，即時挑起阿爺怕樓市起泡沫的敏感神經，7月中旬打後，官方打壓地產的言論及行動不斷出台，而且愈來愈狠，溫總在政治局開會後打開口牌話要「防樓價反彈」，內房股先至腳軟。
中央已派出督查組，到各大省市調查地方政府的限購措施和差別化房貸執行情況，廣東省仲話要對監管不力的官員問責，廣東省副省長許瑞生話，新建住房價格上升太快，保障性安居工程建設進度緩慢，租售管理和後期使用監管不力，要按照規定對相關負責人追究責任(香港講完無做好似無所謂)。官員愈講愈激，市場盛傳中央會再出兩大辣招對付樓市，首先係取消商品房預售制，即係唔可以賣樓花，目的係減慢發展商的資金回籠，其次係全面開徵房產稅。
阿爺要房價「合理回歸」，見有反彈就打，內房股近期都唔會有運行。不過，阿爺要「穩增長」，又不得不提升對房價上漲的容忍度，唔會打到佢太傷，所以又唔可以對內房股睇得太淡，等佢地回深啲，可以買少少責吓倉，不過要有忍耐力，要等。你睇兩隻國貨內房股中國海外和華潤置地，走勢一啲都唔弱，特別係中海外簡直係強，除了因為它上半年賣樓賣得好之外，阿爺要「國進民退」，加上阿爺內房公司唔怕執笠，都令資金避入中海外這類股份中，你話啲避險資金走去邊，根本無得避，所以我估中海外和華潤置地回一段都會再升，直到市場避險要求放鬆為止，若覺得中海外升得太多偏貴，可以等華潤置地，昨收14.82元，若等佢回得深啲到13元邊才吸，防守性會相當強。
和黃業績可以交差
講硬香港地產股硬啲，例如長實(001)，昨日公佈業績，股價雖然跌了1.1％，收102.3元，但其實佢股價圖出現一個好靚仔的微型上升軌，顯示市場都唔想睇淡香港地產股。
長實及和黃(013)昨日派成績表，如果不計算去年同期出售投資所得，和黃業績較去年同期增長12%，長實則增長5%。誠哥在發佈會上表示，下半年環球市場將持續動盪不安，但對中港長遠經濟前景仍然保持樂觀，如若歐美情況持續，長實和黃未來5年發展情況都會相當好，若無大變化，長和系未來5年盈利仍有增長。我話以和黃這種跨國企業，在歐洲咁差的地方都有廣泛業務，上半年仲有12％增長，都可以交差啦。
陸羽仁
上一頁 下一頁
金融High Tea 舊文
