金融High Tea——玩得咁癲唔過癮
2012年8月30日
■昨日上升的都是炒自由行概念的股票，好似做服裝的包浩斯升咗6.8％，做化妝品的莎莎升3.2％，卓悅升1％。
股市悶到發慌，期指開市高開然股市悶到發慌，期指開市高開然後一插，15分鐘內已走完全日波幅，恒指開市先跌後上上落落，上下波動只有93點，收報19788點，跌23點，成交437億；內地股市弱勢，上證綜指跌1％，港股欲升乏力。
銀娛(027)基金股東Permira沽售套現。該股未受減持消息影響，股價更彈高3.4％，收報22.65元。真明麗(1868)研發LED專利聲稱有突破，股價飆升84％，收報1.78元。
地產股昨日已風雨欲來，做地產的嘉華國際(173)業績好都唔升，仲要跌1.5％，有少少燶味。收市後傳來消息，話特區政府見樓價咁癲，要出組合政策打壓樓市，包括推幾幅「港人港地」，即係唔俾外地人買的土地，又話要加建居屋，總之有一籃子政策出台。
政府出招壓樓市
唔好話呢啲政策無料到，政府一出招，勢必打擊地產股投資氣氛。咁又唔怪得政府，樓價係咁喪升，玩得過癲自然唔過癮，政府唔做嘢實俾人媽到飛起。不過個股市已經咁殘，內地股唔掂，國際金融股唔掂，若果地產股又插埋一份，恒指潛行空間都唔細喎。
港股靜到喊，個市牛牛皮皮，真係炒乜都死。經紀張無嘢做打電話來，講到阿爺放寬深圳等地非戶籍居民來港自由行，佢媽媽叉叉，話政府無鬼用，阻唔到內地人來香港云云。我見佢咁嬲，專登同佢鬥吓嘴，話議員、傳媒咁鬧好正常，你做股票都去鬧埋一份，就真係倒自己米，你睇昨日升的都是炒自由行概念的股票，好似做服裝的包浩斯(483)升咗6.8％，做化妝品的莎莎(178)升3.2％，卓悅(653)升1％，若連佢哋都唔郁，仲有乜股好郁？
我同經紀張講，香港而家除咗旅遊之外仲有乜嘢得？香港所謂四大中心：金融、航運、貿易、旅遊四個產業，你做金融知道，今年拍烏蠅，新股上市少到無朋友，散戶炒乜都輸失晒蹤。講到航運同貿易，甚至包括港商在內地做廠，全部因為內地出口唔掂無運行，你睇李超人去年將和黃旗下珠三角的港口以信託形式在新加坡上市大幅減持，就知佢有幾「睇好」中國出口、特別係珠三角出口的前景。
香港四隻腳斷咗三隻，剩得旅遊一瓣仲好景，搞到市面仲好似好繁榮，搞到失業率低見3.2％，我叫經紀張唔好加把口去嘈啦，雖然開放深圳非戶籍居民來港明顯係豬頭骨，問題係香港無豬肉食，豬頭骨你要唔要啫。
玩剩旅遊生意縮
經紀張俾我講到無聲出，我話千祈唔好以為我覺得新政策好正，只係覺得香港賣點愈來愈少時，唔可以咁揀飲擇食。你睇昨日炒自由行股，都有少少夾硬嚟的感覺。升得最多的包浩斯其實早前由去年9月高位3.28元，一路下跌，跌一半有多，如今只是低位反彈，佢到今年三月全年業績倒退34％至7589萬，已在反映零售業的困局，生意唔係無，但舖租升、人工加，生意無同步升，毛利就下降。內地再放多啲自由行，會幫到少少，唔係幫到咁多，恐怕炒一炒反彈後，升幅又係曇花一現。
昨日高檔消費股如周生生(116)已經唔得，佢早前抽上過，昨日回吐1.6％。當然可以話斷估放埋深圳非戶籍居民來港都係買奶粉、買公仔麵、頂籠買吓衫，唔會買珠寶，所以周生生唔升。但係鐘錶珠寶業最受銅鑼灣、尖沙咀天價租金影響，內地水緊更直接影響豪客的購買力，珠寶股的好日子已過，更加唔易翻身。
陸羽仁
上一頁 下一頁
金融High Tea 舊文
