金融High Tea——燒銀紙與印銀紙
2012年10月18日
■城市電訊炒高7.5%至1.72元。但城電老闆電訊魔童王維基就十分激氣，話政府「吊吊揈」，前朝政府「議而不決」，現屆政府更倒退到「會而不議」。資料圖片
歐美股市向好，金融股繼續推動大市，大笨象匯控(005)發威，漲1.8%至76.55元，升上去年7月底高位。中資金融股繼續受到追捧內銀股，「九行」全部炒上。
近期唔少分析員以至大投行都力捧。瑞信昨日改變對內銀股睇法，將對中資銀行股的評級，調番上「增持」，預計即將公佈的第三季業績，利潤按季減少約6%，但與去年相比，仍會有最多一成的增幅。不過，報告對招行(3968)及民行有保留。瑞信又話中資股最壞時間已經過去，國企指數12000點才算合理，建議投資者加注。
港股人氣急升，連升5日，創半年新高。恒指收市升210點至2141點，升幅接近1%，國企指數繼續跑贏恒指，漲1.2%，造10491 點。大市成交回升至574億元。
商務及經濟發展局局長蘇錦樑昨日話免費電視牌照申請的審批，要視乎財政穩健、服務質素等，進度有進展，但不便透露細節。股民聽到發牌可能有轉機，異常興奮，城市電訊(1137)炒高7.5%至1.72元。但城電老闆電訊魔童王維基就十分激氣，話政府「吊吊揈」，前朝政府「議而不決」，現屆政府更倒退到「會而不議」。
講起傳媒，最近肥佬黎要將台灣檔生意賣掉，惹來城中熱話，昨日壹傳媒(282)終於公佈交易詳情，睇完嘩一聲，壹傳媒同辜仲諒簽咗意向書，以46.4億港元作價，收埋一成訂，出售台灣蘋果日報、爽報、壹週刊同埋壹電視的業務。拆散計賺錢的台灣報刊賣42.4億，蝕錢的壹電視都賣4億港紙。
界外效益難以計價
壹傳媒之前停咗牌，停牌前收市價1.12元，市值27億，若以收番46.4億現金計，等如每股1.92元，賣完台灣還剩下香港資產，股份今日復牌。由於我自己都有少少佢啲股份，所以就唔好研究股價啦，只能夠歎句傳媒股若然肯賣資產，竟然可以咁值錢。
好多人話傳媒競爭激烈，叫人做報紙，等如叫人燒銀紙。但係亦有人話，傳媒做得好等如印銀紙。你睇肥佬黎檔台灣壹電視，年蝕10億港紙，本來話以3億港紙賣俾練台生，而家都可以抬高到4億作價一齊賣埋俾辜仲諒。做傳媒第一睇你做得好唔好，第二睇你肯唔肯賣，做得好又肯賣就可以賣到股東想像唔到的高價。
好多有錢佬想擁有傳媒，因為有界外效益，好似辜仲諒買台蘋，有好事之徒又話辜家同內地關係好，買報紙有政治動機云云，我覺得有少少捉錯用神。辜仲諒在台灣前朝惹落唔少是非，一度離台，回台後以慈善家面目出現，如今做埋媒體大亨後，怕且其他人都要俾兩分薄面啩。肥佬黎以42.4億作價賣台灣印刷媒體，我估佢台灣唔計電視大約賺2億幾、3億一年，作價14至16倍市盈率，本來都唔算好離譜，若計埋界外效益，簡直係便宜。
睇完肥佬黎賣台灣生意賣咗46億，睇番香港好多媒體，得幾億市值的比比皆是，仲有唔少係賺緊錢㖭，條數真係唔知點計。以肥佬黎的香港蘋果計，若然肯賣，30、40億都有人要，不過我估佢唔會賣囉。最後你可能問我係唔係有好壹傳媒的股份，我其實得雞碎咁多，我睇住佢出通告話洽售台灣業務，其實問心都唔係好信，以為呢啲老闆又係得個講字，所以趁高興買吓，但係都唔敢買得多囉。
陸羽仁
上一頁 下一頁
金融High Tea 舊文
