金融High Tea——無樓炒 焗炒股？
2012年11月1日
■15%買家印花稅，原來對中環返工住中上環及灣仔的老外也有影響。
港股期指結算後跌唔落去，隔夜美股因颶風影響繼續休市，港股自由行，內地A股早段反覆向下，中午逐步反彈，上證綜指倒升6點至2069點，兩市成交加埋只有818億人仔。港股走勢靚過內地股市好多，高開高走，午後愈升愈有，以近全日最高位收市。恒指收21642點，升213點，成交都係少，得480億。
中環茶友話，恒指近日回吐低位是周二的21362點，昨日升番300點，難道呢一浪回調咁快就玩完？昨日最大的利好是金管局再入市沽27億港紙，壓住港元匯價，金管局前後五次干預共注入港元170.74億元，顯示資金流入未完。
老外買樓夢碎
茶友講起，中環人現時發牙痕話資金無得炒樓，焗住炒股。我就話就算係都無咁快反應，股市反彈，更似係資金在流入中，港股炒上易過炒落啫。
話時話，中環老外對政府搞的15%買家印花稅怨聲載道，不少人來港未夠七年，唔講最高級那一班，講番年輕一族，好多人住中上環、灣仔，租金年年加，即使有房津，想住好啲都唔得，本來都打算買間樓，點知而家一聲令下，佢哋買樓夢碎。政府本來主要打擊大陸人，但連呢班老外或ABC(美國出生華人)都打死埋，搞到中環士氣低落。
政府為防地產商將新盤注入空殼公司然後連公司賣以避稅，話明要打擊。做生意的老友就質疑，記者問曾財爺工商舖都有炒風，財爺話將來都可以考慮管，公司買住宅要俾多15%稅仲講得通，若然連買工商物業都要徵15%買家印花稅，將來點做生意？難道公司只能租樓不能買樓？政府隻手太長，愈管愈多，愈來愈亂。
信和(083)老闆黃志祥都出來講兩句，話佢祖家新加坡都有限制外地人買樓的措施，但作用不大。咁啱昨日地產股連跌幾日都有反彈，信和就彈1.3%，不過長江一號(001)仲硬，昨日在地產股中反彈最多，升2.1%至114.5元，地產股未係跌得好勁，若然跌到呢個水平就企定，只能反映市場都唔係好信政府的辣招有長遠效果。
內銀股可謂榮辱互見，工行(1398)、建行(939)、中行(3988)幾隻大行業績好昨日都有反彈，都升到2%左右，內銀「九行」中只有交行(3328)及民行(1988)逆市下跌，皆因兩間銀行畀摩根大通唱淡。
睇住業績隨時換馬
交銀第三季純利134億人民幣，按年升12%，但按季跌12%，費用增長及資產質量亦面對挑戰，淨資產收益率按季從21%降至16%，存貸比率於第三季仍處於79%，存款增長按季跌6%。由於不良貸款持續上升，以及短期淨資產收益率的壓力，摩通將佢評級由「增持」降至「中性」，目標價由6.75元降至5.9元。交行跌2%至5.54元。
民行資產質量進一步惡化，不良貸款按季上升8%，今年至今升28%。淨息差亦持續下跌，今年至今跌50點子。民行核心資本充足率低，低於8.5%，風險加權資產較高，反映銀行需籌集更多資本。摩通評級由「中性」降至「減持」。
大家要知道，內銀股慢慢過了高增長時代，未來要面對利率逐漸自由化和息差收窄的挑戰，經濟唔好時還有壞帳增加的壓力，佢哋正隨大市在一種反彈向上的氣氛中，但投資者要睇業績做人，好似民行，業績轉差，可以馬上換馬，內銀有九隻馬，唔使騎死一隻，要靈活應變呀。
陸羽仁
上一頁 下一頁
金融High Tea 舊文
