金融High Tea——炒友哀歌
2012年11月12日
恒指上周五繼續回吐，再跌182點，兩日跌咗700點，雖然美股上周五企番定，杜指微升番4點，但小心港股調整未完，牛證重倉區在22100點至22299點之間，街貨量等如近1000張期指，唔知發行商會唔會推波助瀾推低個市回收埋呢批街貨。
雖然美股受所謂財政懸崖困擾(簡單講即美國又要加稅又要削赤，總統和國會可能講唔掂數)，還有一段低迷期。但我哋祖國開完十八大下周選出新領導人，斷估無痛苦，都會搞吓嘢沖喜一下，對股市有啲支持。
中國末季 經濟將彈
中國經濟在改善中，商務部公布10月中國出口增長11%，中國商務部部長陳德銘話，中國出口9月增長9.9%，10月增長11%，這只能說明形勢有一點微弱的好轉，今年前十個月外貿增長不到7%的情況看，要完成2012年全年外貿增長10%左右的目標很困難。
外貿雖然唔到數，但權威人士同陸羽仁講，中國第四季GDP將會反彈，確認第三季GDP的低增長7.4%已經見底，雖然第四季GDP反彈的力度未必會大，但肯定中國經濟已在第三季軟着陸。既然經濟反彈，再加上中央加大力度推基建項目兼放水救市，可以預期中國企業盈利在第四季都會反彈向上。股市外圍的大勢是美國因總統選舉產生的利好消失，中國因新領導上場的利好將會發酵。
早前收到網友Iris Lau的留言，觸發不少網友感慨甚深，值得和大家分享。
Iris留言如是說︰「陸Sir 你好，在2011年3月，你建議我將月供的股票，由中國人壽(2628)換到中國海外(688)或華潤置地(1109)。跟隨你的建議，我在2011年4月開始，將在中國銀行月供股票儲蓄計劃的股票，轉成中國海外，並承諾按你的提議，在月供三年後告訴你結果如何。」
她續說︰「如今過了19個月，已過了我三年目標的一半，我想讓你知道我月供中國海外的結果。第一，總共買了3175股，平均價15.28元。第二，總共收了701元股息。第三，今天中國海外收市價是21.45元(留言日股價)。我的月供中國海外股票增值了40.4%，如果我繼續供中國人壽，我想月供計劃不會有此成果。雖然我的三年計劃仍有17個月要供，至少我目前感到十分快樂。十分多謝你的建議。到2014年4月時，我會告訴你我的月供計劃最後的成果。再謝。」
月供換馬 成績驕人
老實講，Iris投資一年半有40%回報，絕大部份基金都無咁好成績，回憶起Iris 2011年3月問我的時候，可能真係用咗幾十秒諗諗兼睇咗5幅圖就答佢。在2007年好多人睇好國壽，即使在2008年底股市大跌之後，還有股評人睇國壽3年、5年見100元，這個目標價在股民心中印象太強，到2011年初Iris問問題時，國壽升番到30元，但100元的目標價仍殘留在好多股民腦海中，覺得國壽還有很大上升空間。
但我不太喜歡國壽，我早年已講過，有銀行家去探訪當年國壽的老總，發覺他目空一切，是一派未經競爭的國企大老總模樣，擔心這間企業受不了競爭的考驗。過去幾年國壽股價不前，除了因為內地投資市場不濟令佢資金回報差之外，其保險本業經營狀況不理想，也令投資者卻步。當Iris問到好唔好再月供國壽時，覺得她一注獨供壽仔，風險太大，想建議她轉供其他股份。
當時馬上睇了5張3年走勢圖，分別是國壽圖、恒指圖、國指圖、中國海外圖和華潤置的圖，當時恒指升上近25000點時回吐橫行，國企指數走勢相若，但國壽已有開始有級級向下的走勢，弱於大市。相對地中國海外和華潤置地走勢比大市略強。
國壽走弱 中海外勢強
買國企最大好處是有國家支持，部份行業更是壟斷性的，但最大唔好處是管理較差，若面對競爭時不易應付。國壽面臨的問題是保險業市場逐漸開放，唔知它這一家大國企能否應付競爭。相對地中國海外和華潤置地雖也是國企，但卻久經內房業的競爭，我親自睇過佢哋的樓盤發覺質素真係唔差，房地產業最大難題是市場逆轉時資金鏈條會斷裂，但國企房地產商最大強項是有國家資金支持，前列品牌唔怕執笠。睇完圖更印證了我對國壽和中海外等的比較，發覺市場先行者都在做我估計的事情，正在減持國壽。
所以我就建議Iris，不要再供國壽，轉去供中國海外或華潤置地，她資金有限，不能供兩隻，否則我會建議她供一半中國海外或華潤置地，另一半供追蹤國企指數的恒生H股ETF(2828)，這樣做結果回報少啲，但風險分散啲。長線投資，要在風險和回報中求取平衡。
19個月過去，中國海外由2011年4月初的股價約15元，升到而家20.75元，升咗38%。國壽在去年4月初仲在30元樓上，而家得番23.1元，跌咗23%，所以供兩隻股有雲泥之別。
了解自己 贏谷輸縮
Iris的經驗發人深省。第一，長線投資揀股好重要，揀住隻衰股，好可能得個桔，所以一定要花點工夫去做研究，起碼睇到大方向。現在中國海外股價高了，而家開始月供，好難期望1年半後又有40%回報，但月供是10年的長線投資，供了一家管理良好的公司，即使投資市場有上落，它自然會帶你出紅海，唔使太掛心。除非股價升得太高太顛，市盈率開始離譜，才可以考慮減持一部份。
第二，「投資的我」跑贏「投機的我」。Iris的「投資成績報告」在我的網誌貼出後，好多網友嘩嘩聲，話炒咗年半，打個和都偷笑，睇到Iris有40%的回報，真係眼都突埋，真係「炒友哀歌」。
我唔係原教旨主義者，並唔會叫人唔炒，有啲朋友炒咗十年廿年，叫佢唔炒難過戒煙。我的建議是分開「投資的我」和「投機的我」，將自己的資金分成兩部份，一部份投資，買入好股揸較長時間，即使在升得急時減持也不要全數沽清，另一部份投機，以你炒慣的方法炒作，搵本簿記錄兩方面的成績，然後增加賺錢較多的那部份投入資金的比例，減少輸錢部份比例，贏的部份谷，輸的部份縮。我估好多人都係「投機的我」業績唔好，咁就減少投機增加投資，例如將「投機的我」過去操控百分百的資金，變成只用一、兩成資金炒作過吓手癮。
按以住的經驗，「投機的我」多數只是在大牛市之時才有好表現，例如2007年時，連盲炒都贏大錢，造就好多老年、中年、少年股神，但呢啲大牛市幾年唔逢一潤，到熊市時，就是炒友失落時。我的結論係了解自己，可能比了解股票更重要。
陸羽仁
上一頁 下一頁
金融High Tea 舊文
