金融High Tea——阿爺坐不住
2012年11月15日
中共十八大閉幕，今日開一中全會就會選出新任總書記和常委班子。前日內地股市再插，傳聞前晚阿爺已經發功，被內地媒體形容為「管理層火線救市」，一方面加速引入境外資金入市，幾大部委決定增加合格境外機構投資者(RQFII)投資額度2,000億人民幣，令試點總額度達到2,700億元。另一方面，人民銀行繼續逆回購向市場投放1,860億元人民幣資金，實行放水救市。
阿爺坐不住，唔想產生新領導層這些大喜日子股市跌到七個一皮，連夜出招後，內地A股昨日企番穩，上證綜指上午一直下滑，到1點幾見底，然後一個小V反彈，最後升0.4%，但市底仍弱，成交少得嚇人，上海深圳加埋只有709億人仔。
火線救市內銀受惠
港股亦索到少少龍氣，昨日強番啲，近排好流行的「三點後跌市」並無再出現(即內地收市後港股再插深啲)，尾市再彈上，以近全日最高位收市，升253點至21442點，國企股仲勁，漲1.7%。美中不足的是成交量麻麻，全日只有483億元。中環茶友話，大市係唔係企番定唔知，但有番啲顯著反彈，追沽太深的淡友中咗招。
睇大型股盤路，升市的確和內地放水有關，巨股類別中資金融股最受惠，恒生中國H股金融行業指數升2.1%，當中以國有四大銀行表現最好。
紙業股受內地炒作影響，人民幣匯價創新高，內地紙業股大幅上揚，福建南紙A股首先漲停板，佢哋買機器負債係美元，收入是人仔，人仔上升變相還少啲債，對佢哋有利，但本地上市造紙股就個別發展，玖龍紙業(2689)大升5.4%，相反理文紙業(2314)卻要跌0.3%，表面看玖紙總負債相對資產淨值比率高達122%，理文只有70%，人仔升值因素令玖紙受惠，但睇埋股價你就知，理文股價根本好強，本來就快升到全年高位，玖紙弱好多有排未到今年高位，而家只係追番啲落後。
睇好潤地看淡恒大
內房股都全線造好，當中表現最好係百零億市值的合景泰富(1813)，勁升6.3%至4.74元，大隻內房股以華潤置地(1109)最好升3.3%，龍頭股中國海外(688)亦升2.7%至21.1元。潤地股價標青係因為瑞銀出報告唱好，指2012年銷量很可能超出其目標20%，按年升37%。
2013及14年盈測分別上調18%及13%，目標價相應由15.1上調至19.21元，評級維持「中性」。報告指潤地位於二線城市的三家商場，投資成本低，回報率有10%至20%，令人鼓舞，但同時指出中國零售銷售增長放緩，或會打擊所有商場經營者，特別是可能會降低其市盈率溢價。
瑞銀睇淡內地三線城市樓價，認為供過於求，所以唔係幾睇好主力發展呢啲地區的恒大(3333)，預計恒大的項目將面對價格下調壓力。由於公司管理層定下目標要淨資產負債比率由今年6月底的107%下降至全年約80%的水準，瑞銀預期恒大要積極減低借貸及提供更多價格優惠加快去貨，加上今年降價促銷會影響毛利率。瑞銀將目標價由4.4元下調12%至3.86元，評級由「買入」降至「中性」。恒大昨日未受唱淡影響，股價仍升2.8%至3.71元。我就話潤地12.6倍PE，恒大得4倍PE，價差咁大係唔係已經反映咗業績差距呢又？
陸羽仁
上一頁 下一頁
金融High Tea 舊文
