金融High Tea——搭雞棚
2012年11月26日
港股上周五繼續反彈向上，再升170點，升上21913點。美股亦發威，感恩節得半日市都大升，杜指升172點，預計港股今日仲有得借勢炒炒。
上周一我借住網誌有1億次瀏覧的機會，畀建議讀者，叫大家將組合內主要資金，長買價值股，惹起好多朋友的回應，我想借此機會再與大家分享。
網友「cashin」有一個好好的總誌，話我講的問題其實等如「你寧願好刺激咁輸，定係好悶咁贏？」我估好多人都無認真咁諗過呢個問題，只是隨着感覺走。
網友「依家控股」講佢自己爸爸的例子，就是一個典型。佢話：「陸SIR，今日你在頭條日報專欄講投資羸投機輸，在下好有感觸。好多人話投資股票其實唔難，只要「等跌買大股死坐」就掂，以前好多人就咁咁樣供獅子銀行(005)贏大錢，不過後來「大股」有啲變質， 除左八號仔(008)係經典外，連獅子銀行都五年上唔返高位。」
依家控股舉佢爸爸的例子：「在下老竇2007年炒股仔輸身家，好在仲有層供完嘅港島藍籌屋苑單位連車位，結果輸到賣樓賣車位搬去新界，不過去新界買過另一層樓，賣樓套現還埋百萬賭債，都仲有成百幾二百萬畀佢養老。在下老竇係好賭之人，日日要起身睇市，睇住啲股價同埋報價機上買賣兩邊條隊就會開心，佢仲係有學識的人，70年代大學畢業，英文好，去書局買啲500蚊本嘅鬼佬股票書嚟研究，主要都係圖表派，不過佢學完之後就應用在啲股仔及牛熊證上，結果不問而知。」
老竇慘輸 阿仔心痛
依家控股繼續講：「老竇炒輸錢賣樓還錢的事，已經過咗三年，見佢愈炒愈縮，我食飯同佢講，「如果你200萬等股價平的時候，在3蚊樓下瞓落去買3988(中國銀行)， 一年6、7厘息，一年最少收10萬息，你咁樣炒炒吓，一年炒唔炒到10萬？」佢出唔到聲無回應。?家成日見啲財務公司廣告，有身份證同電話就借得，真係有少少擔心老竇會唔會再錯一次，不過如果佢再錯，我估佢又輸100萬， ?家層新界樓值300萬，賣完樓還完錢都仲有百零萬，可以買番層天水圍上車盤比佢過世嘅，始終層樓係佢捱返嚟，佢想輸咗層樓，係佢嘅自由。人就係咁，好地地「等跌買大股死坐」咪OK囉，但咁樣太悶，唔覺得自己係投資緊，但長炒真係十個有九個輸，真係無奈。」
依家控股老竇慘輸的故事，佢不是今日才講，記得幾年前佢老竇炒股輸錢欠落一身債要被逼賣樓時，佢都有留言問過我點算，如果三年前唔係賭輸咗被迫賣樓，而家層樓連位隨時值800萬、1000萬，沽咗佢買中行，一年收60、70息，印印腳。估唔到佢老竇經過一場教訓，都未戒到手癮，搞到3年後又要個仔擔心。
據依家控股所講，佢老竇係70年代大學生，學識唔錯，識得睇英文投資書，但一樣搞成咁。大家要知道，70年代讀到大學的多數係叻人，而家本地中學生入政府資助大學的比率係18%，但70年代時只有1%，的確是百中選一的聰明仔，但咁有學識的人炒股都唔掂，皆因股市有一個特性：「專收叻仔」。
真嘢唔靚 靚嘢唔真
如果你自認愚笨，或者至少對股市愚笨，叫你等跌市時買好股長揸，甚至買指數基金長揸，你唔會太抗拒，可能首要關心係隻股派幾多厘息，因為揸住股票唔郁，對你唯一有刺激是收股息的時候。但若你自認叻人，英文又得，投資書睇唔少，當然不安於「等跌市買好股」的笨方法，想找出制服股市巨龍的良方，找出打敗股市的秘訣。正當叻人在鑽研炒股秘方時，大鱷就食住叻人的心理，佈下重重陷阱，等叻人落疊，聚而殲之。
大鱷殺人的方法，萬變不離其宗，都係造出極其吸引的局面，要生意有聲勢佢有聲勢，要盈利有盈利，要走勢靚佢有靚走勢，要成交佢有成交。叻人都係人，你要乜大鱷都畀乜，自然會心動，以為搵到筍嘢。
我最近同公司的同事開會，講起競爭對手在「搭棚」，佢哋完全唔明我講乜，我問「你唔知搭起個雞棚點解呀？」佢哋搖搖頭，唔知係我講嘢粗俗，定係年輕人入世未深，唔知呢個世界好多假嘢，做生意可以搭雞棚「凶」對手，股市做局，就係要搭雞棚引對手入局。
舉個例有一間零食店愈開愈多，而且是開在通衢大道，我心諗呢盤生意點做呀，香港鋪租貴人工貴，呢間嘢開始時開在舊區細商場、租金較便宜的地方開檔，仲有數圍，而家開在咁貴租的大街上，有無錢賺㗎？做零食唔同莎莎、周大福、D&G，可以大做高消費遊客生意，零食鋪賣嘢開單錢碼細，利錢薄，佢瘋狂開鋪，撐到咁大，所為何事？
我斷估無痛苦，覺得零食舖咁亂玩，只為炒股，開舖等如做戶外廣告，只為讓人人見到佢個招牌，令你覺得好勁，如果咁叻又可以搞到盤數好靚，然後反覆向上炒，就有人信。叻仔初時對呢隻股無信心，但見佢反覆炒高，圖表走勢好靚，股價跌親都反彈，加上業績又好的話，自然會落疊。若果仍嫌只是一隻本地股唔夠「重口味」，可以加啲進軍大陸概念，求其在大陸開三幾間做辦就當係真，又或者搵個乜嘢猛人或基金入股，搞到咁堅，你信啦啩？
真嘢唔靚，靚嘢唔真。蠢人見到醜醜地的東西都肯買，叻仔唔見到靚嘢唔願意落疊，所以在股市搭起雞棚做局，就係想收啲搵好嘢食想買10倍股的叻仔。妙就妙在有啲叻仔其實明知有人在做局，佢都照樣行入去，因為佢相信自己俾其他散戶聰明，其他人走唔到，自己會走到。但佢哋唔知道，大鱷睇晒老散的底牌，你唔夠佢玩。
控股投機 小賭怡情
例如一隻股仔，開始時市值兩三億，牌面有50%街貨，牌底其實只有10%街貨，另外40%揸在大戶手中。莊家可能係用市價再7折價錢攞呢40%貨在手，成本只是7000、8000萬，佢自然同公司大股東夾好，間公司搞吓生意，莊家搭棚炒股，做到股價圖靚一靚，一條上升軌，每跌到支持位都反彈再向上。請問依家控股個老竇買本500蚊鬼佬技術析書學到的東西，去分析一個土炮人造圖，又有乜意義呢？隻股係咁炒，3億市值炒到30億市值，到好消息出現時，例如公布業績爆升、進軍大陸或者猛人入股之類，開始吸引跟風散戶落疊，就是大戶出貨之時，佢唔使沽晒所有貨，舉例30億市值時沽一成收番3億，25億市值時沽一成收番2.5億，夾埋收咗5、6億，扣番8000萬成本加搭棚費用算佢1億幾，都仲有3、4億袋袋平安，跟住佢放手唔頂，隻股就變自由落體。散戶唔易走得到，一則莊家沽貨都係在最好的時候沽，那時散戶唔捨得走，二則如果莊家未散貨，隻股跌完會升返突，股價完全被人為操控，你唔信，佢就搞高搞到大部份人信為止，你沽咗都會俾佢引到你回頭買，點走？
股市中有好多這類人造美女，你俾佢滾一次唔出奇，滾十次都仲得，但唔好俾佢滾一世，去歡場俾人搶錢搶到三、四十歲，都要收手啦，就算唔徹底收山，都要控制自己被人滾的次數，減少損失。
賭開好難戒，最好先從減量入手，本來自己倉位100%係炒，而家減一半，甚至減70%，只留番30%係炒，其他70%資金低買價值股作長線投資，然後過一兩年，比較「投機的我」和「投資的我」的業績，如果投機真係可以賺大錢，可以加注，唔得，就要再減。若只用10%資金投機，小賭怡情，無傷大雅，我都唔太反對，但如果好似依家控股老竇咁，四、五十歲仲成日輸仲要賭身家，就好唔理性，要控制吓啦。
陸羽仁
上一頁 下一頁
金融High Tea 舊文
