金融High Tea——你南巡 我炒股
2012年12月11日
中共新任總書記習近平上任不久即「南巡」，直追1992年鄧伯伯南巡之風，擺明要支持改革開放，和上手胡總上任時去參觀革命勝地西柏坡大異其趣，不過市場唔關心呢啲政策大路線，只留意有乜股可炒，見到幾隻深圳股爆升，手上無貨恨得牙癢癢，甚至入市追貨。
深圳控股(604)大升8.4%至3.22元，深圳國際(152)升4.1%至0.77元；在成都和深圳做發展的花樣年(1777)升5.5%，報1.16元，連鐵路股廣深鐵路(525)都升近5.8%，報2.72元，炒得不亦樂乎。
呢一轉炒深圳改革概念，炒前海概念，前海開發區位於深圳南山半島西部，是中國14個開發區中面積最小的，僅15平方公里，主要搞服務業，預期該區固定資產投資達4717億元人民幣，基建投資2665億元人民幣。問題係前海一直搞緊，唔係習總落嚟至批准去搞。
大半個月前開車
唔好怪我睇得陰謀啲，習總要訪問深圳，睇怕都要早一頭半個月部署，自然有啲春江鴨覺得可以借呢個消息炒吓股，大玩「你南巡，我炒股」。升得最勁的深圳控股、深圳國際，都係在11月下旬開始加速起步，之前已升得好急，到昨日再急抽，圖表走勢一枝箭咁上，以深圳控股計，10月時長期得1.8元，而家升到3.22元，升咗差不多80%，你睇完新聞才去追，小心剛好遇上人家派貨喎。我唔係話前海唔得，但呢啲長期投資，要幾年後先見效益，總書記來訪咁好機會，自然要先炒一轉，但之後股價係唔係「有以為繼」，就無人敢包啦。
昨日個市都係炒大陸好消息和外資流入香港，金管局昨日再沽港元注資38.75億，兩星期合共向銀行體系注入240億港紙，顯示資金繼續流入。上周中共中央政治局開會，為內地新一年經濟發展定調，市場憧憬阿爺可能出台刺激經濟政策，昨日公佈11月內地通脹重返2%，走勢顯示通脹下行周期完結，有向上走趨勢，同期工業生產者出廠價格(PPI)則較去年下降2.2%，而降幅比上月收窄0.6個百分點，係連續兩個月收窄，反映內地經濟開始有回暖跡象。
A股繼續反彈，上證綜指昨日再升超過1%至2084點，成交亦配合，上海深圳兩市成交達1492億元人仔。但港股就雞啲，恒指高開187點，創了16個月新高後，無力再上，升幅卻逐步收窄，收市報22276點，只升85點，大市成交626億元。
工信部及財政部昨日正式發通知，要求各地針對煉鐵、焦炭、鉛蓄電池等19個工業，提出2013年淘汰落後產能目標計劃。內地鋼鐵業現時面對最大問題，係鋼鐵廠太多，產能分散，前十大鋼企產量只佔內地總產量的49%，造成資源浪費，競爭太劇烈亦起唔到價。中央的目標係讓大型鋼企進行跨地區、跨所有制兼併重組，到2015年前十大鋼企佔總產量要提升至60%以上。
鋼企大炒重組
鋼鐵業要搞重組合併，對龍頭企業自然最有利。受消息刺激，大落後的馬鋼(323)率先跑出，勁升7.6%至2.27元，而鞍鋼(347)被里昂列入十大沽售股份行列，昨日升幅較弱，只升2%，報5.53元。重慶鋼鐵(1053)仲勁，抽高8.7%至1.37元。
鋼企生意未掂，但近期炒重組已走番上上升軌，可能再反覆向上。而家係政策市，邊個行業有政策支持，就炒嗰個行業先。
陸羽仁
上一頁 下一頁
金融High Tea 舊文
