金融High Tea——鬥放水
2012年12月27日
■近幾年買樓輸少贏多，不過，來年情況會否改變，仍是未知之數。
香港放聖誕假，外圍無市，不過兩個醜市日本同內地都造好。內地炒政策市，日本就炒放水。
日本股市遇大水谷高，近日有跡可尋，日本大選變天，執政民主黨下台，自民黨再揸莊，幾乎講到出口要加大力度打貨幣戰爭，所以選前日圓已不斷跌，創出今年低位。
中日股市齊發威
現在選舉大局已定，日本勢必再推量寬，日本股市連日憧憬資金推動造好。受日圓兌美元相隔1年零8個月跌破85關口等因素提振，東京股市高開高走，收市創九個月來新高。日經平均指數繼續大幅上漲150點，收市報10230點，升幅達1.5%，近九個月來首次收復10200點。
過去日本資金曾經推高全球股匯、套息交易威力到今日仍然令人難忘，所以唔止日本股市向好，連帶亞洲市場都顯露牛氣。
內地股市相比下無咁受日本影響，但外資最近想抄底，紛紛唱好A股。香港兩日假期，內地股市都造好，香港有機會補回升幅高開。
港股今年經歷高低高市況，年初股市向好，隨着年中內地經濟回軟下滑，其後本地樓市向好，地產股發力回升，帶動樓市擺脫下降軌，年尾又靠熊霸天下的內地股市觸底回升帶動。
港股回升，但距離歷史高峰仲有好遠，假期同中環茶友傾起，佢話係金融海嘯前，啱啱買咗層樓，之後全球放水，港股經歷大上大落，但手頭股票升值有限。
相反樓市大漲小回，反覆向上尋頂，至今升值已經一倍，若然計埋借錢的槓桿作用，買樓賺錢多過買股倍計。
係全球鬥放水下，呢個亦係好多散戶寫照，近幾年買股輸多贏少，買樓輸少贏多，不過，茶友話呢個情況有無改變，來年真係唔知。
點解咁講呢？佢話今年樓市好戲劇性，皆因特首換屆，黑馬振英哥跑咗出來，初時大家驚佢會整冧樓市，成個市靜晒，振英哥都好似怕大家賴佢整冧市，放軟口氣話唔會主動推低樓價，經過一段時間，大家似乎覺得佢無料到，累積的購買力爆晒出嚟，買家個個驚今日唔買，明日仲貴。地產商心口有個勇字，屢開天價新盤，搞到無樓想買的市民嘈到拆天，政府焗住再延長短炒稅，再加買家印花稅兩項辣招。
特首打樓價打出癮
面對全球水源增加，雙辣招出台後，樓價仍然未跌，但刺激政府民望的效果就已經出咗嚟，振英哥被僭建風波搞到頭都暈，政府民望就係咁頂住。
茶友話，呢段時間好明顯見到振英哥態度開始轉變，初時佢驚人話佢推冧樓價，到了上個星期，行政會議通過雙辣招，振英哥就親自站台，講明唔會畀公司買樓可以有豁免，好明顯係公開話俾人聽，呢次應該歸功於佢。
樓價升，打擊樓價係政客攞分最簡單的方法。末代港督彭定康上世紀初嚟報到，除了大派福利，同一時間就係宣佈打擊樓價措施，但肥彭係蠱惑政客的頂級高手，佢採取的措施好多都係短期行政手法，因為佢明白樓價跌開好難停，直至97前佢先真係猛增供應，留番支火棒畀接佢位的特首董伯伯，搞出一場冧市大龍鳳。
究竟振英哥係行肥彭條路，抑或繼承董伯伯七成人做業主的宏圖呢，暫時無人知道，而且呢樣嘢好多時係互動，長官意志要樓價跌，你愈話佢唔得，佢就愈出來，初時可能會無嘢，到佢得時就可能過晒火。
即係好似廚師炸嘢，有經驗廚師炸到未變晒色就撈起，計埋餘溫就啱啱好，無經驗的廚師見炸到金黃先起離鑊，咁就已經整燶晒啦！
陸羽仁
上一頁 下一頁
金融High Tea 舊文
