投資的天空：離底不遠分段吸 - 張士佳
塞浦路斯情況仍未明朗，向存戶徵收存款稅的議案，在無議員投贊成票下被否決，令100億歐元的貸款計劃暫時終止。塞國打算向其存款大戶俄羅斯求救，但話曬塞國係歐元區成員國，大哥德國當然不想俄國介入拯救行列。
事情最終發展如何無人知曉，但市場普遍較樂觀，認為歐盟最終都會出手。歐債危機纏擾多年，市場都漸漸麻木了，以此小國而言，傷害性應有限，援助理論上係遲早的事，反而如何避免擠提，會否令其他國家的存戶也對銀行信心大打折扣等，是歐元區領袖更需要解決的問題。
市底似有改善
雖然問題未解決，但外圍股市似乎懶理，尤其是美股，道指即市又創出新高，聯儲局下調今明兩年經濟增長預測，亦無礙升勢，因就算唔需要聯儲局講，投資者都會自動想像，這代表寬鬆貨幣政策會延續一段時間。
港股在周一稍稍跌穿22000點殺牛後，開始見到支持力，尤其前日的表現，是令人有點意外，因相比起港股收市時段，早一晚的美股其實是下跌了，而其他亞洲股市如南韓及澳洲，開市初段都跌近1%，但港股只係稍微低開，並無跌穿近期低位，之後更隨A股反彈。
昨日大市表現似乎平平，但總算連續兩日做陽燭，而且上升個股比下跌較多，市底有所改善。
近日發現多了市場人士忽然看淡，甚少估市的人都叫人唔好心急撈貨，側面說明市場是有一定程度恐慌了，自己唔敢話見底，但如果睇好大市，而調整目標都只係250日線的話(現處於約21000點)，現階段開始分段吸納其實都唔怕。至於個股方面，筆者建議多留意近期唔理大市照升的股票，記緊唔係大跌後作出大反彈的一群。
張士佳
元大寶來證券(香港)業務及商品發展總監
與曾卓鋒(元大寶來證券(香港)客戶經理)聯合執筆
(逢周三、五刊出)
上一則: 青心直說：重拍頻譜硬上弓 - 胡孟青
下一則: 炒友Blog：中國無線食正換機潮 - 邱古奇
投資的天空 - 張士佳 舊文
