金融High Tea——阿爺主導
2013年3月7日
■中國手電商割價補貼賣機大戰將由中移動觸發，股價積弱，連4G概念都炒佢唔郁。新華社
■有記者問及一月外匯佔款，是否意味熱錢流入，周小川話要再觀察，似乎顯示中央無意收緊銀根。新華社
美股創新高對港股的支持，不如阿爺對股市支持咁大，好似昨日咁樣，上證綜指前日急升2.3%，昨日仍然再升0.9%，港股前日升得雞碎咁多，昨日又係升0.96%，港股弱過美股和內地股市，皆因權重股如匯控(005)只升0.4%，中移動(941)仲倒跌0.4%，一眾本地地產股又弱於大市，拖住港股後腿。
或者咁講，好彩阿爺股市呢兩日夠強，唔係港股仲死。睇番昨日，無論大市又好，炒作的個別股份又好，都係跟阿爺。中央在人大政協兩會開鑼前出招打壓樓市，但開會之後放出的多數是好消息。前日溫總理在政府工作報告中提及大力發展資本市場，中國證監會和中國保監會等金融管理部門提及市場有補充資金，推動大陸股市急升。
人民銀行行長周小川開政協期間對記者講話，指儘管今年貨幣政策「相對於高峰期，是減少一些」，但能夠正常支持政府工作報告所提出的經濟增速和物價水準，與今年定下的宏觀經濟目標是配套的。記者問及1月外匯佔款(即外匯流入令人行放出人民幣去兌換)大增，是否意味熱錢流入，周小川話要再觀察，似乎顯示中央無意收緊銀根，支持了內地股市，亦令中資金融股上升，成為推動大市反彈的主要動力。
推平價機大戰快來
老外一直擔心內地銀行面對三大風險，包括利率自由化、去年央行降息將在今年完全反映，以及資產質素問題。標普相信中央將會管理上述風險，透過控制銀行穩定性，以及向地方政府拖壓，不良貸款可維持在合理水平，預期今年內銀不良貸款比率會由2011年的1.7%升至3%。標普都唔係睇內銀股睇得咁差喎。
內地股市個別行業炒得幾勁，香港都有跟炒現象。一個炒作的是4G概念，電訊設備股炒起，中興通訊A股炒到升10%漲停，中興H股(763)大升9%。
唔好以為炒4G概念一定炒埋手電公司，三大手電股唯獨中移動昨日逆市下跌0.4%，其他如聯通(762)和中國電信(728)都分別升1.7%和2%。炒4G概念都炒唔起中移動，相信和傳聞中移動將推出大量價格介乎299至600元人民幣的3G智能手機有關，據說這些平版3G手機的使用體驗絕對唔差過現時3000元的智能手機，中移動借此搶低端客，市場好擔心中移動要俾好多補貼。
中國手電商割價補貼賣機大戰將由中移動觸發，難怪佢股價積弱，我話暫時都唔好掂中移動、聯通及中國電信三隻股，以免消息正式公佈時，再要插一浸。其實一比中移動和建行(939)等內銀股的股價，就見到中移動的弱勢，佢升時唔見得好似內銀升咁多，回落就一樣回咁多，所以博反彈都係博內銀好過。
裸眼3D炒電視股
內地亦大炒所謂「裸眼3D」，我初時都唔知係乜，後來發現原來係不用戴眼鏡看的3D電視，內地炒緊裸眼式3D電視推出後可擺脫了眼鏡的束縛，將來推出時會帶動貴價3D電視銷量爆升咁話，在中港兩地上市的TCL(1070)、四川長虹等家電股均有炒作。TCL昨日升1.4%收6.5元，升得唔算多，但佢近日升破6.3元的上月高位後，繼續向上，睇嚟仍在炒作中，去年年底佢嘅主席李東生在4個幾時不斷增持，恐怕都係睇到電視股的炒作概念。
陸羽仁
上一頁 下一頁
金融High Tea 舊文
