金融High Tea——破位
2013年6月13日
端午節假前，港股唔靚仔，昨日無市，但外圍就唔係咁靚仔。所謂唔靚仔，唔係指華爾街股市，而係亞洲同其他新興市場，最明顯係印尼要宣佈加息去頂住匯價，反映資金撤離亞洲市場有加劇跡象。
亞洲「脫水」同恒指破位與美國傳出聯儲局收水之聲絕對有關，呢兩日高息貨幣如澳幣、紐幣亦破位向下，預示市場甚怕下星期聯儲局開完會將公佈下半年開始減少買債，新興市場股匯先行一步，跌定先。
聯儲收水 亞洲脫水
恒指假前跌260點，收21354點，當日最唔好的跌穿了4月18日的低位21423點，恒指創了今年新低，穿埋250天線，一個破位向下的形態已確認，向下粗粗哋要試穿21000點，比較可能要跌到20000點邊才有支持。
經紀張啲客死晒，輸到怕，唔買股只係買iBond，經紀張媽媽聲，話人哋美股升時港股升唔多，跌又跌快過人，真係唔知想點。
睇番圖都確認經紀張的觀察唔差，恒指今年高位暫時在2月4日見咗，當日最高23944點(見走勢圖)，回到4月18日低位21423點，再反彈到5月20日高位23512點，要注意5月反彈未升到2月高位，距高位差1.8%。其實睇番美股同期走勢，同一個時段美股上晒新高，5月美股比2月高近10%，港股之彈，根本係俾美股扯住上，係跟人尾升，唔係自己有動力上，人哋一回，港股就一仆一碌咁跌落嚟。可以假設，若美國真係收水，港股唔會跌得少。
里昂建議沽收息股
里昂就提示美國聯儲局退市將拖累港股，里昂證券香港策略研究部主管張耀昌在報告中話，雖然退市將逐步發生，但抽走流動性會對本港息率添壓，目前MSCI香港指數相當於2013年市盈率16倍和市帳率1.3倍，並由銀行、地產和公用股主導，這三個行業都會受退市的打擊，公用股更直接受美國國債孳息率上升影響。 里昂因此建議，沽售最受退市影響的股票，籲沽售煤氣(003)、中電(002)、電能(006)、恒地(012)、恒生(011)和領匯(823)。該行認為MSCI中國指數較受中國放緩所影響，但不期望內地有任何放寬貨幣措施，建議減持周期和投資行業如安徽海螺(914)和建設器械如濰柴(2338)。
外圍方面，全球央行的貨幣政策，繼續影響大市。美國5月份小企業信心指數創一年來新高，並超出市場預期，4月份職位空缺亦大幅減少，聯儲局何時縮減買債計規模的擔心又籠罩市場。市傳德國憲法法庭考慮歐洲央行去年承諾購買較弱歐羅區國家國債，以防止歐羅崩潰的做法是否合法。歐美隔夜股市齊齊向下。
日本央行周二提前公佈利率決議，維持利率及資產購買計劃規模不變，日本央行呢個決定係市場預期之內，美元兌日圓跳水，日股跟隨腳軟。
日股昨日繼續向下，日經225指數早段一度大跌1.8%至12994點，失守13000點大關。尾市跌幅迅速收窄，收市報13289點，微跌28點。
有分析指日股尾市之所以咁神勇，主要係日本央行掃入上市交易基金(ETF)撐場所致，呢啲政府行為頂得幾耐仲要睇過至先。
陸羽仁
上一頁 下一頁
金融High Tea 舊文
