投資情商
2014年01月15日
美股傳統有「一月效應」，由於稅務原因，資金在年頭會湧入市場買貨。唔知係咪上年年底美股升到爆標，搞到股民寧願食胡先，今年美股一月效應唔係咁明顯。上日杜指回調成百點，搞到港股低開。不過，港股呢排興玩相反，外圍好，港股好唔晒；外圍衰，港股都衰唔晒，大市跌到咁上下，喺低位又定咗喺度。
港股出現呢種唔衰唔好的怪現象，其實係反映中美兩大市場冷熱交攻。家美股「㷫合合」，唔少人驚佢熱到爆；A股就鐵底都怕篤穿，卻有唔少大戶博佢衰到盡轉勢，港股係兩大冷暖中間，變成遇熱降溫、遇冷變暖的狀況，家港股從資產同盈利估值計都唔算貴，但又處於經濟運行周期頂部，故此向下跌照計唔跌得幾多，向上升又唔升得幾多，喺咁狀況下，係考驗股民「投資情商」的時候。
唔冷靜好易衰
乜嘢係投資情商呢？中環茶友話，簡單啲講即係炒嘢時候點控制情緒囉。作為投資者要謹記買賣係為咗賺錢，唔係為咗過癮，唔好為買賣而買賣，同時見到個市升就要靜，見到個市跌就要定，按自己對大市的分析同選股策略行事，否則個市升升跌跌，你左行右行，好容易畀人左打一巴、右打一巴，打到失魂，亂晒方寸，跟住就被大戶搶荷包。
受外圍美日股大跌影響，恒指低開251點至22638點，離250天牛熊分界線只有38點，但已經係全日最低。
港股跌唔落去，反而係靠內地A股帶挈，無再跌落去。上證綜指朝早跌近2000點後急彈，之後一路向上，恒指中午已收復大部份失地，離上日收市還差5點已經無力再上，午後跌番落嚟，收市跌幅擴大至97點，收22791點；國企指數跌33點至10149點，大市成交唔夠600億元。
喺咁市況下，個股最搶眼係之前抽升14%之後停牌的盈大地產(432) ，宣佈正在與獨立協力廠商磋商出售北京盈科中心權益，不過，暫仍未有結果。盈大昨日復牌，股價裂口高開17%至3.6元，隨即爆升上4.18元，及後回順至收市的3.83元，仍然大升近兩成半。
新股又再玩抽獎
盈大洽售北京盈科中心的消息傳過幾次，公司都係話煲無米粥，今次就話係深度洽談，睇嚟公司好有興趣出售，市傳售價超過50億元，成事套現超過公司市值同可換股債券價值，故此股價大幅爆上。
股民近日又愛上玩新股抽獎，今日掛牌的童裝品牌銷售商米格國際(1247) ，暗盤市場收報3.45元，較招股價2.28元高50%，每手不計手續費賺2340元。米格國際一手中籤比率僅3%，要認購200手才可穩取一手。
另一隻同日掛牌的營養素補充劑零售商南京中生(3332) 暗盤收報2.65元，較招股價2元都高出33%，每手不計手續費賺1300元。南京中生一手中籤比率100%，散戶賺錢反而易過炒熱門股。跟住就要睇市傳熱爆的Magnum截飛交出點樣的成績表。
陸羽仁
金融High Tea 舊文
