炒股自救
2014年01月20日
梁特首公佈的《施政報告》大派福利畀低收入階層，特別是那個低收入津貼，一個月最多派2600元最犀利，連帶家庭成員有71萬人受惠，我估大部份《頭條財經報》的讀者不能受惠，中產讀者年年納稅，就是為派錢政策找數之人。
政府派了多少，高官自說自話，財爺鬍鬚曾當日話係200億經常性開支，政務司司長林鄭後來話《施政報告》新增經常開支只是100億，看來200億之數是包埋未來預算案要加的經常開支，例如公務員和津助機構要加人事同開支的數字，點講經常開支都要加200億。本來香港經濟好、收入高時，關顧基層都係應該做的事情，但家講緊是經常性開支，一派咗出去，好難收返，經濟好經濟唔好都要繼續畀，香港又無消費稅，市好時仲有賣地收入幫補吓，市唔好時，地賣唔出，同經濟相關的稅收如利得稅又會縮，只能由中產交的薪俸稅做中流砥柱啦。
政制逐步開放，大家唔好以為只是派一鋪，我估會愈派愈多，若2017年真係有普選，肯定各候選人會大開空頭支票，基層人數多，中產人數少，派畀邊個可想而知。
好多中產朋友問我點睇，本來我唔想講政治，但都忍唔住話︰「這只是開始，往後陸續有來，我都要迎來派福利的十年吧！」從一個財經作家的角度，只能話畀大家聽中產要預咗被劏，或者炒股自救啦。
供應續增 貴樓莫追
或者你覺得我咁講好無聊，其實我係認真的，香港暫時未有增值稅、利息稅(未來就唔敢包啦)，所以炒股主要睇你功夫好唔好，功夫好炒咗賺咗可以落晒袋，當然你炒親都輸就係例外啦。中產點講都係慘，想財務自由，唯有靠自己啦。
最後還想講多兩句《施政報告》同中產的關係，就係《施政報告》益唔到你，你千祈唔好畀佢害死埋。當外界話《施政報告》無益中產，行政會議召集人林煥光出來護航，話《施政報告》唔係無照顧中產，中產目前最痛是難置業，新一份的《施政報告》在土地房屋供應落實了很多數字，長遠看來，這些都對中產有利。
嗱，千祈唔好唔信邪，話政府搵嚟講，我睇死你未來都增加唔到樓房供應，我都係搶番間先啦。我就話政府做嘢一係唔夠一係過多，家不斷咁增加供應，又話增加20%地積比率，又話將來居屋量由每年5000間加到8000間，睇長線住宅供應由過去唔夠到將來會變過多。政府講明起多啲平樓益中產，你唔信走去搶貴樓，真係左一巴右一巴畀人打兩巴。當然，買地產股不同買樓，《施政報告》無新一波打壓樓價措施，有利地產商谷一谷盤去一去貨，地產股跌得深啲時反彈吓都唔奇。
中國海外 候低可買
講番炒股自救，撇除睇到個別股份基本因素好好之外，大路去講主要有三法，第一是買大股食波幅，第二是炒新股搵餐茶，第三則為炒熱股博大霧。
先講大股，睇嚟今年都係上落市為主，能夠在較低位買，有機會食番一浸，盡量係唔低唔買，因為無論香港或內地股市，都似係上落市而唔係大升市。以港股計，一年在5000點左右上落，若然高低位係25500和20500點，家係中間偏高少少。以內地上證綜指計，一年波幅約600點，去年低位1850點，家2004點，假設今年低位比去年高，大約1900至1950點，家較接近低位，大約還有3至5%向下空間。所以炒大市波幅，可能先吼內地指數股如A50基金(2823) 好啲，因為佢仲跌緊，要買可等佢跌深啲，或分注向下買。
若然你覺得炒指數股好似大路咗啲，可以捉吓內地大股中國海外(688) ，雖然去年最低見17.7元，但過去一年大多數時間在21至25元中間走，現價21.65元，對上一星期見過20.25元，等如再跌穿21元時，20個零幾買，睇一年都有機會食佢20%。中國海外基本因素OK，現價歷史市盈率9.45倍唔高。亦有大行睇好，例如花旗就剛剛提升中海外評級，由「中性」調升至評級「買入」，目標價升至30.5元。花旗話，內地去年有7家發展商合同銷售超過1000億元人民幣，而業內龍頭內房公司在高基數上，仍錄得不錯的增長。中海外除了有規模優勢之外，母公司中建還可以透過注入資產、參與發展等方式支持它，相信中海外在2014年以後仍能有更佳的突出表現。
熱門新股 莫揸過世
母公司注資是中海外的強勁催化劑，最早可望在今年下半年獲得注入，花旗估計可注入的可建樓面面積達1700萬至1800萬平方米，其中1100萬至1200萬平方米是位於一二線城市。母公司中建正積極增加購入一些大型的高價地段項目，在2015年後或有機會再注入中海外。花旗認為以中海外目前土儲水平，2014和2015年已經可以達到每年有超過20%的銷售增長。若有其他項目從母公司注入，銷售可望進一步提升。花旗確認中海外為行業首選，目標價由29元上調至30.5元，評級「買入」。
我將中海外當作炒波幅大股之選，因為它是國企，風險較低，若變民企風險值就提高，如碧桂園(2007) 和恒大(3333) ，它們的股價更平，但亦更弱，它們波幅更大，你買多啲要承擔較大風險，若風險承受力較差者，不如候低買中海外。
第二招搵食招係炒新股。對一般散戶而言，若然資金有限，反而較佳，因為可以專揀熱門新股去認，認到唔理佢係手機遊戲股又好，娛樂場所股都好，上市首日即走，唔好問咁多基本因素，因為如今係「大市冷、新股熱」，在熱門市道上市，本來已貴，再加上上市後升三幾成，就變成貴上加貴，若新股市道逆轉時，即使有基本因素支撐者也要捱價，何況好多係吹水股，所以唔係唔炒，係轉身要快。
酷派當炒 小注怡情
第三招是跟炒熱門股，家香港市場兩大熱門類別是科技電訊股和賭股，呢啲股嘅炒作特點係高處未算高，但當中良莠不齊，炒咗唔識走好易中伏，是富貴險中求的類別，我的建議手痕可以玩玩，唔好瞓身，最好跟住和基本因素相關的消息炒。
例如去年大炒金山軟件(3888) ，除咗佢本身業績有進展之外，更多是炒大老闆雷軍可能會將流行的小米手機業務注入。近期開始大炒的是前身是中國無線的酷派(2369) ，事緣佢日前宣佈成立電子商務品牌大神。酷派大神手機成為首款商品，於本月13日正式開賣，售價為1888元人民幣，根據官方透露，5萬部手機於18秒即售罄，而累計預售量已經達到700萬部，大神機好似出到少少位。
匯豐亦出報告，上調對酷派的投資評級，由原來「中性」升至「增持」，同時上調目標價，由3.2元升至5.33元，相當預測2014年市盈率13倍。匯豐話，中移動將大力擴展4G TD-LTE市場，今年的TD-LTE手機銷售估計為1億部，按年增23%至42%；同時，酷派將成為最先推出較高端定價(約1000元人民幣)的LTE手機廠家之一，面對的市場競爭仍有限。
當然大家要注意，酷派在改名和推新手機後，單是一月已由2.5元升至如今3.72元，可以大升，少少回吐都可以跌番10、20%，穩少少等佢回吐先買，衝動派都唔好瞓身，升跌都可以好急，小注怡情呀。
陸羽仁
金融High Tea 舊文
