熊仔何時醒?
2014/3/11 上午 09:35:08
網誌分類: 經濟
中國出口數據差令昨日中港股市下挫，但美股先跌後回穩，以微跌收場。杜指朝早最多跌近120點，午後跌幅逐步收窄，收市跌34點，報16419點；標普500指數跌券唔夠1點，收報1877點，納指微跌2點，造4334點。
內地上月數據差勁令全球股市受影響，特別係原材料股受打擊，貿易及工業品出廠價格指數(PPI)遠不如預期，當中出口大減18.1%，與預期的增長7.5%大相徑庭，相差25.6個百分點，是10年來和預期最大反差。經濟增長放緩本來已對原材料股有打擊，加上上海超日太陽賴債，觸發市場擔心紅銅需求弱，加上銅庫存持續增加，令上海期銅昨日一度大跌5%至跌停板，收市仍跌近4%，報47,260元人民幣。其他資源價格亦跌，焦煤期貨及焦炭期貨昨亦曾跌停板。
消息令上證綜指昨日大跌2.9%，收報1999點，失守2000點大關。港股跌1.8%都正常啦。
不過分析師就話市場過份擔心，內地股市跌得過份咁話。花旗銀行中國研究部主管沈明高接受傳媒訪問時話，內地指數返回5年前，但期內中國經濟規模增長了81.1%，目前內地估值低殘，原因是市場過度擔心，憂慮中國經濟增長放緩，理財產品出現違約等問題，但他相信中央不會容許出現大規模違約。美國復蘇主要來自房地產這種非貿易類別，中國出口往歐美市場仍弱，中國監管影子銀行令貸款大跌，減低了風險，但同時影響了整體流動性，都是令經濟走弱的原因。
總結一句，係中國經濟的確較弱，但不會出現雷曼式風險，市場過度擔心了。
中國原料價大跌，亦影響到美國。原材料股係昨日拖累大市的主要力量，美國出口大跌18.1%，進口則上升10.1%，遠差過預期的增長6.8%，貿易亦由上月的順差變成接近230億美元貿易赤字，市場則預期有145億美元順差，貿易數據出現咁大落差，主要原因係反析預期中國農曆新年，中國內部消費理應大增，點知中國人對進口貨需求未有預期強勁，令分析跌曬眼鏡。
中國係全球最大的銅及鋼材最大消耗國，經濟活力減弱，對鋼才需求大減，令到美國出口大跌，出現明顯貿赤。而近日已經非常疲弱的銅價亦百上加斤，再跌1.3%至每磅3.042美元，全球最大的銅金生產商 Freeport-McMoRan 再跌2.5%，鋼鐵基金指數(Market Vectors Steel ETF)跌1.7%。
原料價咁弱，手持原料股的網友還要捱，但我又唔認為差到咁，跌咗咁多可以揸住睇睇。因為經濟真係好差時，阿爺又會出招，唔好在跌得多時出貨。
昨日講到美國唔少分析員認為今年美股表現會遠差過去年，但仍有些許升幅，「熊仔仍未瞓醒」，牛市起碼可以延續多一年。今日又講吓相反理論，MarketWatch專欄作家辛西爾(Michael Sincere) 昨日撰文指出大市唔係好似大家預期的咁樂觀。佢話牛市已經在上周二(3月4日)到頂，五歲牛市已經玩完。
現時好多投資者仍然大大聲聲話大市仍然可以升得更高，已經反映牛市走到了最後階段，到達非常危險階段。在這個時刻，投資者反而將自己從現實中抽離出來，彷彿已經登上了另外一個星球。
辛西爾指出，警報其實已經無處不在。首先係，市場出現好多唱好嘅「啦啦隊」，好多散戶怕錯過牛市的第六個年頭，將資金傾入股票共同基金。這就像以前每一次崩盤或者熊市到來之前的境象。第二、Investor Intelligence最新調查顯示，熊派所佔比例已經不足20%，為1987年崩盤前夜以來所僅見。第三、好多重要情緒指標都顯示，投資者和交易者正變得越來越自鳴得意。都相信最糟糕的情況不會發生，即使有危險，聯儲局會出招救市。第四係投資者忽視經濟基本面。明顯已經過高的市盈率又好，經濟疲軟又好，都當無事發生，經濟數據唔好，就賴壞天氣影響。第五係納指近三年的走勢，簡直是神話一般，3月4日一舉攀上了近十四年最高點，市況已經非常熾熱。最後係投資者已經忘記了2008年大冧市的教訓。市場已經或者接近達到轉折點時，投資者和交易者卻仍在有什麼買什麼。擔心錯過機會的恐懼演成了購買動力。結論係佢睇淡。
你可能問我，一日講牛，一日講熊，我自己點睇，今年係美國牛市第6個年頭，玩到6年好好彩，尾段會愈玩愈開心。照睇今年聯儲局會逐步將印鈔放水停住，到年底停曬放水就開始講何時加息，我覺得議論加息之時(可能係今秋)，就係牛市完結之日，所以斷估無痛苦，熊仔仲未醒，但可能在今年下半年瞓醒，當然，呢啲咁樣的宏觀分析，你信住三成好啦。
陸羽仁
回應(5) 我想回應
陸羽仁 BLOG 舊文
