俗粉變天姿
2014年08月14日
大戶好似唔想畀個市跌，指數開市呆呆吓，但下午又抽上，明日公佈業績的中移動(941) ，股價未揭盅就爆上，市場普遍預期佢業績會倒退，點知大戶有理無理就抽高佢頂住個市。
中移動包裝完再炒
今年上半年，市場焦點走去炒科網股，當時科網股之得，變成電訊股之失，皆因科網當道，不斷侵蝕電訊股的收益。過去盈利長期維持壟斷性增長的電訊股好景不再，中移動股價亦一度由高位回落27%。?家市場對上半年業績其實仲係看淡，估計純利繼續倒退，但有大行就話，中移動主力以TD制式發展4G業務，未受到FDD發試驗牌照威脅，同時仲炒作iPhone 6，有望令中移動每戶每月平均收入(ARPU)起死回生。大摩早前就發表報告，上調中移動目標價33%至100元。
?家市場炒作中移動，唔係炒佢實際盈利，而係炒作佢嘅4G概念。本來中移動估值唔係貴，派息算OK，先前啲大戶嫌佢係庸脂俗粉，缺乏驚艷賣點。?家想捧佢，化吓妝又話係天姿國色，可以迷死人喎。
兩隻重磅股中，騰訊(700) 公佈截至6月底止第二季業績，股東應佔盈利58.36億元(人民幣，下同)，按年增長58.59%，好過市場預期的賺50億至54.5億元。集團計劃將下半年的工作重點放在用戶參與度、遊戲組合的擴充及平台提升，而非增加收入方面，因此未來兩個季度的智能手機遊戲收入，與第二季度相比料大致保持穩定。
騰訊喺公佈業績前股價已衝上高位，?家好消息證實，照計應該係出貨時候。分別係?家市場炒緊資金流入，所以調整幾多都好睇大戶點揸法，佢昨收市微跌0.1元，報133.2元。
內地7月貸款僅增3852億人民幣，遠低預期，搞到大市昨早開市無乜動力，但中移動尾市發力；加上匯控(005) 配合下，恒指尾市拗腰急彈200點，與7月30日高位24912點相距不遠，創多年收市新高，即月期指收報24895點，升262點，高水5點，成交5.48萬張。匯控及中移動是升市火車頭，合力推高恒指64點。匯控收報82.6元。最近一個月明顯強勢的港交所(388) 升1.4元，造180.8元。就算內地上月人民幣貸款遠差預期，四大行仍反覆向上。
昨日交投略為轉旺，成交金額重返700億元以上，中環茶友笑言，金管局陳總都話有錢流入炒滬港通，會唔會有人聽到唔想執輸，都走嚟買番一份呢喂！
資金流向中字派
近排三桶油表現幾旺，中石化(386) 再升上近期高位外，5、6月一度因為產能困擾的中海油(883) 呢排都追落後，昨升番0.2元，收報14.54元，近排資金似乎繼續流入呢啲傳統重磅中資股。
收市後，政府宣佈批出兩塊住宅用地，地價總計為43.678億元。其中荃灣地皮由億京以39.39億元投得，可建住宅不少於790個；另一幅較細嘅馬鞍山地皮就由宏安合組財團以4.28億元投得。
億京係近年冒起的發展商，過去主力發展東九龍的工商物業，今次係首度喺住宅市場出擊。今次地皮呎價3400幾元，計起唔算貴，從買家背景同中標價錢，顯示中小型樓宇雖然最近出現癲市，但大財團投地，仲係用死雞價買平貨為主！
陸羽仁
金融High Tea 舊文
