異動空間：買開達兩大理由
港股四連升，但感覺動力不足，似淡友平倉多於實盤掃貨，建議繼續打遊擊，盡量輕倉過夜。另一方面，大戶沽強股食糊，再拎利潤博醜股反彈，注碼明顯縮曬水，取態相當審慎，呢種反彈通常難以持續。
想細注快走一轉，可吼位吸納開達集團(180)。呢隻老牌玩具股上半年虧損7,262萬元，但7月以來股價翻了一番，成交急增，大龍鳳呼之欲出。主席丁午壽今年72歲，料離退休不遠；前年，兒子丁天立亦辭任董事總經理，反映無意接棒，抵殼股搶手執番幾億銀合情合理。資料顯示，大股東持股58%，首10家證券行共持有81%股份，貨源集中度10粒星，賣盤無甚難度。再睇資產，每股NAV值2.03元，PB僅0.47倍，炒折讓收窄都夠殺。去年7月媒體報道，公司低調放售九龍灣開達大廈，意向價25億元，公司雖否認，但卻揭示開達資產何其豐厚。何況東九龍發展如火如荼，等多陣隨時賣貴幾億，無壞！他日成功賣出，大派特別息屬指定動作。
開達剛以千萬元成交飆升17%，創52周新高，可候0.9元買入，博賣盤加資產折讓收窄，目標睇1.2至1.3元。
魏力
http://www.facebook.com/2012jason
魏力
異動空間 - 魏力 舊文
