魚樂無窮：洛鉬H股半價大平賣
領匯(823)一如預期染藍，不能再以REIT量度其投資價值。除不停翻新旗下商場提升叫租能力外，亦透過買賣商場擴大版圖，儼然平民版地產霸權，但從投資角度看，則更具吸引力。用3厘回報做目標，短線可炒上55元，潛在升幅兩成，以其屈機營運模式，長線變紅底股不是夢。
滬港通似是疑非，上周五傳出監管當局向證券行追收滬港通保證金，概念股乘勢炒上，但最後又係冇料到，港股倒跌收場。唔通又中伏？咪住，689噚日上京出席APEC高?會，引述阿爺話短期會公佈時間表，相信今日又有一番光景。滬港通只係稍有風聲流出，成交話咁易突破700億銀，證明熱錢準備就緒，只要長雞一鳴，就會爭住衝入場。
滬港通鑊氣再現，今日推介都跟隨呢個路線。洛陽鉬業(3993)H股上周五收報4.88元，A股報7.23人民幣，折合9.1港元，H股較A股折讓近五成，夠條件大炒。
估值平坐享四厘息
集團Q3盈利按年增長55%，較首三季盈利按年增長62%輕微放緩，近期鉬價亦回落跡象，但洛鉬股價卻不跌反升，點解？估值便宜是也，彭博綜合券商預測，洛鉬今年市盈率將降至11.8倍，兼有近四厘息打底，相當吸引。睇埋圖表，早前回試前浪頂4.3元後已經跌唔落，更反地心吸力挑戰五元大關。炒收窄折讓概念，以A股七折價計，可見6.37元，潛在升幅三成，屆時亦較整體AH股僅折讓1%平一大截。
唐牛
https://www.facebook.com/tongcow88
唐牛
魚樂無窮 - 唐牛 舊文
