悶市炒概念
2014年11月04日
日本上周公佈加大放水規模，歐美股市上周五抽升，可惜港股仲係斯人獨憔悴，好彩係仲有廣船(317) 因變身為軍工股，股價單日爆上七成幾，令到個市叫做有啲氣氛。
如果講外圍因素，呢排算係幾唔錯，美國未有加息時間，杜指終於爆上創新高，內地股市個勢都好強，A股向好，滬指連升五日，上證指數收報2430點，漲9點，創近二十一個月新高；深成指數收報8240點，漲14點。中美股市咁靚仔，香港自己就唔係咁爭氣，開市無耐已經乏力，由升轉跌，全日恒生指數收報23915點，跌82點；國企指數收報10660點，跌95點。
收市後匯控(005) 公佈第三季業績，稅前盈利46.09億美元，較去年同期上升2%。期內營業支出增加15%，至111億美元，若不包括重大項目，營業支出增加6%，首三季列帳基準稅前利潤按年下跌9%至169.5億美元。市場話業績遜預期，不過陸羽仁就覺得係預期之內。
匯控繼續靠亞洲搵銀
匯控近排傳出不少賠償或講數的開支，條數受影響已經係預期之內，加上績前佢股價已經無厘神氣，出嚟業績照計都唔會好。美國社會近年對銀行印象麻麻，經常搵銀行嚟開刀祭旗。在佢哋眼中，匯控唔係自己友，郁起手上來完全唔使講情，所以喺美英地方嘅生意，真係有排捱，倚賴亞洲特別係香港生意賺錢，相信係匯控、渣打(2888) 短期難以改變的事實。
大市悶悶哋，但個股就不乏精采。焦點之一係自今年4月停牌的廣船，變身成軍工股，落實向母公司收購軍船基地「黃埔文沖」，復牌後股價即爆上，收報23.65元，大升9.922元，升幅超過七成。
軍工股係美國一大板塊，由於佢哋以世界警察為政治定位，對外用兵基本上無停，而且佢哋將大量研發同生產工作外判，與私人企業合作，好多重型工業巨企如洛歇等都係生產軍事戰機，呢啲軍工大企業反而掉轉過嚟影響番政府的外交政策。
相比之下，內地軍工股基本上係空白，呢期大家興起炒呢味嘢，主要係因應美國推動重返亞洲戰略，國家主席習近平又係硬骨頭，唔會一味退讓，未來中國投入軍備的資金佔生產總值比例，預料會大幅提升，加上俄國與西方關係緊張，不排除部份軍備出口生意會流到內地，於是借四中全會大炒呢個概念。
軍工概念雖然聽落有噱頭，但真正做起上嚟係咪有好多公司可以變成洛歇，家都無人知，因為美國係資本主義社會，容許資本家大發戰爭財，內地係中央集權國家，軍事設備未來可以有幾商業化，仲係一個謎。所以，軍工股炒起上嚟有概念無限大的好處，無人知可以升到去邊，實際值幾多錢又係另一回事，炒賣呢類股份最緊要係未上車前要諗定點樣落車，咁至唔怕搞到上咗車又唔落得咁濕滯。
內航股繼續飛
隨着油價低企，內地航空股表現搶鏡。東方航空(670) 、南方航空(1055) 分別抽升逾5%，國航(753) 漲0.8%。油價弱勢睇嚟未完，手頭有貨者可以食啲胡，但就唔使咁快賣晒，慢慢沽貨分段獲利，希望喺升浪中賺得盡啲。
昨日另一個表現突出嘅股份係內房股，10月中國42個城市成交按月增長12.6%，創今年新高，當中四大城市平均增幅40.7%。龍頭內房股表現唔錯，中國海外(688) 、華潤置地(1109) 都逆市漲逾1%。民企內房個別升得仲靚仔，綠城(3900) 單日就彈咗5.33%，報8.5元。
陸羽仁
金融High Tea 舊文
